Mittarfik oqallisaaginnarnani pilersinneqarli piaarnerpaamillu piviusunngortinneqarli. Pilersinneqarnissaa Inatsisartutigut Aningaasanut Inatsimmut ilanngunneqareerpoq taamaalilluni piviusunngorsinnaanera pilersaarusiorneqarnissaalu qaninnerulerluni. Aningaasanut Inatsimmi 2025-moortumi tigussaasumik aningaasaliinikkut oqaasertaliinikkullu ilanngunneqarpoq.
All.: Lars Poulsen, Inatsisartunut Ilaasortaq, Siumut
Mittarfimmik sanaartornerup piaartumik aallartilertorneqarnissaa Siumumiit piumasarissavarput.
Ittoqqortoormiinut angalaniaraanni, nuna alla aqqusaaqqaarlugu ullullu arlaqartut atoqqaarlugit tikitassamut apuunniartarneq attatiinnarneqarsinnaanngilaq. Ittoqqortoormiiniit Ittoqqortoormiinullu angalaniarneq eqaatsumik aaqqiivigineqartariaqalerpoq. Tamanna innuttaasut pisariaqartippaat.
Nuna alla tikeqqaarnagu Ittoqqortoormiit tikinneqarsinnaasariaqarpoq – tamanna innuttaasut malugisariaqarpaat. Isumaqarpunga toqqaannaq tikinneqartalernermikkut inuussutissarsiornikkut ineriartortoqalissasoq. Takornariaqarneq annertuumik isumalluutaavoq annertusarneqarnissaalu pisariaqarluni. Minnerunngitsumik qaninnerulersutut attaveqaqatigiinnikkut innuttaasunit misigineqartariaqarluni.
Illoqarfik inoqaannarnissaa, piujuartitsinneqarnissaa ineriartortinneqarnissaalu pingaaruteqarpoq, tamannalu mittarfiliornitsigut qulakkiissavarput.
Ittoqqortoormiini suluusalinnut mikinerusunik mittarfiliortoqarnissaanut periarfissat sulissutigineqarneranni inuussutissarsiornikkut siuarsaanermut aningaasaliissutit aammalu suliffissaqartitsiniarnermut aningaasaliissutit kiisalu allat suleqatigineqarsinnaasut suleqatigalugit mittarfik pilersinneqassaaq.
Ittoqqortoormiinut Mittarfik!