Ittoqqortoormiini mittarfissaq tassaavoq nunatsinni ataqatigiinnermut pingaarutilik

Allattoq Lars Poulsen, Inatsisartuni ilaasortaq, Siumut

Siumut aalajangiusimavaa Ittoqqortoormiini mittarfissaq sanaartorneqassasoq. Pineqartumi taamaallaat attaveqaatit pineqanngillat, pineqarportaaq qulakkiissallugu, Ittoqqortoormiit nunatta sinneranut qaninnerusumik ataqatigiilersinneqarnissaa – inuiaqatigiinnut tamanut, aningaasaqarnikkut inuunitsigullu.

Naalakkersuisooqatigiit suleqatigiinnissaminnut isumaqatigiissutaanni erseqqippoq, Tasiilami aamma Ittoqqortoormiini mittarfiit nutaat pilersinneqarnissaat Naalakkersuisut aallartissagaat. Ilutigisaanik aalajangersarneqarpoq, nunatta karsiata aningaasartuutinik atuineranut aqutsineq sakkortusarneqassagaluartoq, taamaattoq aningaasarsiornikkut siuariartortuarnissaq atugarissaarnerunissarlu qularnaarumallugit pisortat aningaasaliisarnerat suli pisariaqassasoq.

Taamaakkaluartoq aningaasanut inatsisissatut siunnersuummi Ittoqqortoormiini mittarfiliornissaq siunertaralugu kronimik ataasiinnarmilluunniit immikkoortitsisoqarsimanngilaq. Tamanna ernumanartorujussuuvoq. Nunatsinni ataqatigiinneq unammillernartorsiortillugu, ajortumik oqariartorneruvoq,  Ittoqqortoormiit suli nangittumik avataaniitinneqassasoq.

Siunissamut aningaasaliisariaqarpugut – suliniutinut inuussutissarsiutinik ineriartortitsisinnaasunut, suliffinnik aningaasarsiornerulernernillu pilersitsisinnaasunut, aamma innuttaasut tamarmik pitsaanerusumik periarfissinneqarnissaat angorusullugu.

Ittoqqortoormiini mittarfik tassaanngilaq inuulluarniut –  tassaavoq sumiiffiup ineriartortinneqarsinnaanissaanut tunngaviit pingaarutillit ilagisussaasaat aamma nunatsinni inuiaqatigiinnut ataatsimoortumik ataqatigiissitsilersussaq.