Inuussutissarsiutit

Siumut sulinermini tunngavigaa nunatsinni aningaasasiornerup ineriartornissaa, inuussutissarsiutinik assigiinngiiaartunik innuttaasut iluaquteqarlutik periarfissaqarluarnissaat ineriartornitsinnut tunngaviussammata.

Siumut anguniarpaa nunatsinni inuussutissarsiutit assigiinngitsunik tunngavillit ineriartortinneqarnissaat, nunanut allanut unammillersinnaassusillit. Inuussutissarsiutinik ingerlatsivinnut atugassarititaasut pitsanngorsarneqartuassapput, aningaasarsiornikkut tunngaviisa eqaannerulernissaat anguniarlugu.

Nunatsinni aningaasarsiornikkut pilersuutaasut tassaapput aalisarneq, tunitsiveqarneq, suliffissuaqarneq, nunalerineq, kiffartuussinerit, piniarneq takornarialerinerlu, siunissamilu ilanngullutik pilersuutaalersinnaasut ilaat tassaapput aatsitassarsiorneq, erngup nukinganik atuineq imermillu niueruteqarneq. Nunatta isorartuunera aamma avinngarusimalluta inooriaaseqarnerput pissutigalugit, inuussutissarsiutinik assigiinngiiaartunik ineriartortitsinissaq pingaaruteqarpoq. Taamaattumik sumiiffiit pilersissinnaassat aallaavigineqassapput, soorlu uumasuuteqarneq nunalerinerlu Kujallermi ukiut 100-t sinnerlugit ingerlanneqarsimasoq, nutaaliornikkut ineriartortinneqassaaq.

Issittormiut kulturiat silarsuarmi malunnartinneqartuarpoq. Filmiliornermik inuussutissarsiuteqarneq siuarsarneqassaaq. Atuisunit pisariaqartinneqarpat Nunatsinni filminstitutimik pilersitsinissaq sulissutigineqassaaq.

Innuttaasoq kinaluunniit piumasoq inuussutissarsiuteqarnissamut periarfissaqartinneqassaaq. Inuussutissarsiutinut tapersiissutit ineriartortitsinermut siunertaqarnerusumik atorneqassapput. Suliffeqarfinnut pisortat tapiissutigisartagaat pitsaassuseq tunngavigalugu ineriartortinneqassapput.

Pisortat suliffeqarfiutaat ingerlatsiviusinnaapput niuernermut unammillernermullu inatsisit tunngavigalugit ingerlanneqarpata, suliassaqarfillu namminersortunit akilersinnaasumik ingerlanneqarsinnaanngippat. Suliffeqarfinni pisortat pigisaani pisortalersuisarnerit kalaallinik salliutitsiviussapput, ilisimasat piginnaasallu nunatsinniiginnarnissaat qulakkeerumallugu.

Siumup nunatsinni tunisassiat illersorpai pingaartillugillu, taamaalilluni unammillersinnaasumik inuiaqatigiinnullu iluaqutaasumik ingerlatsisoqarniassammat.

Pisuussutit uumassusillit, soorlu aalisakkat, naleqarnerulersillugit tunisassiarineqartalernissaat politikikkut aqqutissiueqataaffigineqassapput, pisuussutit nalillit tamakkiisumik aningaasaqarnikkut nunatsinni iluaqutigeqqullugit.