Inuussutissarsiornikkut pitsanngorsaanerit anguniarlugit ilungersortumik sulisoqartariaqarpoq

All.: Aleqa Hammond, siulittaasoq

Inuiaqatigiit ineriartorluarsinnaaqqullugit Siumut Naalakkersuisooqatigiinni ilungersortumik kajumissaaruteqarpoq; inuussutissarsiutitigut suliniarneq annertunerulersinneqartariaqarpoq.

Inuiaqatigiit nukittuut piussappata aammalu kinguaariit tullissaanut toqqissisimanartumik atugassaqartitsiumalluta inuussutissarsiutit siuarsarneqarnissaanni ullumikkornit ilungersornerusariaqarpugut.

Aalisagartatta suliareqqinneqaratik avammut annissuuttarnerat unittariaqarpoq. Angisuumik eqqarsarneq tullinnguuttariaqarpoq. Kalaallit Nunarput tassaasariaqarpoq aalisarnermik inuussutissarsiornerminni aalisagaq tamaat isaatitsissutigalugu ilungersortoq. Erngup nukissiuteqarnikkut tunisassiorneq akilerluarsinnaasoq ataqatigiissumillu nalitusaaffeqartoq pilersitassatut Siumumit isumaqarfigaarput. Tunisassiatta nalitusarneratigut isaatitassat amerlanerpaat qulakkiissuavut aammalu qallunaat nunaannut aalisagartatta aningaasarsiorfigineqartussanngorlugit inissisimaneq qimalluinnarlugu. Naalakkersuinikkut tunisassiorneq annerusumik anguniakkatut inissinneqartariaqarpoq, tamanna pisinnaavoq tunisassiorfimmik nalitusaavimmik pilersitsinikkut. Piffissaavoq pisuussutitta pissarsiaqaatigineqarnissaa tamakkiisoq qulakkiissallugu naalakkersuinikkut sulinissaq.

Aasaanerani sulinngiffeqarnermi maluginiakkat amerlasuut isummerfigaavut, tassalu immakkut angallannikkut avannamut isorliunerusut ajorluinnartumik inissisimanerat aaqqiivigineqartariaqartutut isumaqarfigaarput. Sineriassorluni ilaasartaatit isorliunerusunut tikittaleqqittariaqarneratigut qulakkeersinnaavarput timmisartukkuinnaq angallassinerup akisoqisup tamanut naligiinnerusumik atugassaqartitsinerulersumik atugassaqalersitsineq. Takornariaqarnermi kiffartuussisut nunaqqativut salliutinneqarluinnarlik aammalu takornariaqarnikkut akileraarutit isaatinneqartut avataaneersunit sulisoqartut tamarmik nunatsinnut akileraartussaatitaaffeqarlik.

Umiarsuarsuit takornariaqartaatit ilaasuinut tamanut akitsuutitigut ullormut akiliuteqartarneq atuutilerli, taakkuummata sineriassuatsinni, kangerlutsinni, nunaqarfitsinni, atugassatigut allatigullu inuiaqatigiit pigisaanik atuisut annikitsuinnarmillu inuiaqatigiit iluaqutissaanik isaatitsissutaallutik.

Tingerlaatilersortut nunatta imartaanut appakaatissappata immikkut Kalaallit Nunaanni Namminersorlutik Oqartussanut qinnuteqaqqaartoqartalerli, qulakkeerniarlugu nakkutigineqarnerat aammalu pinngortitami kusananngitsumik pissusilersorneq unitseqqullugu nakkutigilerlugulu. Taakkuttaaq nunatta imartaanut isernerminni ullormut akitsuutitigut akiliisalerlik.

Takornariartaassuarnut ilaasut Kalaallit Nunatta imartaaniinnerini ullormut akitsuuserneqartalerlik, ataasiakullaannartumik pinani. Annertussusaa isumaqatigiinninniutigineqarli. Kangerluit, sineriak, iluliarsuit, illoqarfiit, nunaqarfivut, qaqqarsuit, silaannarissuseq, inuiaqatigiiusugut immikkuullarissut, kulturerput tamarmik tunniussaasut naleqartumik ullormut akeqassasut isumaqarpugut. Piniarfiit tammaarsimaartarfiillu piniarfiit piffissaliussat iluani tikinneqartannginnissaat anguneqarli. Takornariaqassaagut inuiaqatigiit ileqquvut kinaassuserpullu minnerunngitsumik avatangiiserput akiginagu.

Isummersuutit pingasut aningaasarsiornikkut annertuumik isaatitsissutaasinnaasut innuttaasullu inuuniarnerini oqilisaaqataasinnaasut Naalakkersuinikkut aallunneqartussatut isumaqarfigisat qaqippavut. Piffissaavoq angisuumik eqqarsarluni aningaasallu nutaat isertinneqarsinnaasunut sammisumik sulinissaq. Inuussutissarsiuteqarnikkut isumaqarluartumik aaqqissuussissaagut ulluinnarni inuuniarneq ullut tamarluinnaasa akitsoriartortoq killup tungaanut ingerlasoq ilorraap tungaanut saatinniarutsigu.

Aningaasanut inatsisissap suliaralugu isumaqatiginninniutigineqarnissaanut isummat ilai matumuuna qaqippavut, neriulluta partiit allat aamma aningaasatigut nutaanik isaatitsinissamut peqataajumallutik isummersoqataajumaartut.