Inuiaat nukittuut pilersinneqassappata ilaqutariit qitiutinneqartariaqarput
Inuiaat nukittuut pisariaqartippaat oqaluttuarisaanerput isigalugu, akisussaaffitsinnik ilorrisimaarfiginninnissarput siunissamillu ilusilersuisinnaasariaqartugut – ilaqutariit qitiutillugit, ataatsimoorfeqarneq tunngavigalugu inuullu naleqassusaa pingaartillugu.
Siumut takorluukkanik pilersaarusiortoqassatillugu kingumut pereersunut qiviaqqaarnissaq pinngitsoorneqarsinnaanngilaq. Taakkuusussaammata tikkuussisussat anguniakkamut piviusunngortikkumasamut. Pingaarnerpaaq annermik tassaasarpoq apeqqusiisinnaaneq: Qanoq aallartippa? Qanorlu ingerlava? Aamma qanoq iluatsissava? Ullutsinni inuiannguit ikeqisut inuusaasianni killiffiannilu ilungersunartuni arlalinni qiviagassaqarpugut. Akornatsinni inuuniarnikkut ilungersortorpassuaqarpoq, ilaatigut immikkut ikiortarialippassuarnik ajoraluartunik taqiinnarnikunik ilaqartunik. Kinguaaniit kinguaanut, ileqquliussaniit ileqqunngortunut. Sarfap ingerlaarnera uninngisaannartutut ippoq, soorlu timmiaq miffissaqanngitsoq.
Ukiuni qulikkaani arlalinni ingerlareersuni ilaqutareeriaatsit nunaqqatigeeriaatsillu allanngujartorfianiippugut. Piniartuunermiit aalisartuunermut, aalisartuunermiillu sulisartuunermut. Sulisartuunermiillu ilinniakkanut qaffasinnerusunut ikaarsaarnermut. Taamaattorli susassareqatigiinnerup aqqani ullumikkut aningaasat qitiunerpaalersimapput. Inuup inuunera pingaarnerpaajunnaarsimalluni. Inuup naleqartitai sallersaajunnaarsimallutik, allaallumi inuup naleqassusia apeqquserneqarsinnaalersimalluni. Killiffik ilungersunartoq aporaaffippassuarnik nassataqartitsivoq. Naliginnaaleraluttuinnalersimapput akerartuunnerit, oqarsinnaasormigooq akisariaqarmat. Nikassaaneq sumi tamani piulerpoq, ajuusaarnaqisumik pissaaneqarniunnerup iluani killeqanngitsumik ajortussarsiorneq naliginnaalersimalluni. Aali kinguaanut maligassiuineq ingerlaartoq, taakkummita kinguaavi sumut qillissimassappat?
Qangaanerusoq susassareqatigiinneq inuiaat iluanni piugallarmat. Oqartoqaannarani “illit susassarinngilarma oqaasissaqanngilatit” ileqqut nunatta avataaniit pissarsiagut inuusaasitsinni ilaalersimasut ileqquliussatullu ulluinnarsiutigilersimasagut maanna pingaartitatsinni naleqartitatsinnilu annertungaatsiartumik allannguisimapput.
Meeqqiortartorpassuit annerusumik qanoq meeqqamik paarsinissamik perorsaanissamillu ilitsersorneqarsimanngitsut. Imminut napatinnissamut ikorfartorneqarsimanngitsut, ilaatigut tunniutiinnarsimallutik ajornartorsiutuiminnik matoorisut. Imigassaq aanngajaarniutillu atorlugit ulluinnarni inuunerminni qimaanikut.
Pisortanik ikiorsiissutit atorlugit sulinissamik anguniagaqarnissamillu pingaartitsiunnaarnikut. Sulinerooq akilersinnaanngimmat. Akerlerluinnaanik suliffeqarfiit inunnik qanimut sullissisussanik nunarput amigaateqartoq, qullersallu ajornartorsiut qangali ilisimagaluarlugu allanngortitsinaveersaartut. Inuit nukissallit ilungersortut, pisut nammanniarsaralugit amerlasuutigut ikiortissaasuarlutik inuusut. Oqaannassanerpugut taamaattussaasimagamik taamaapput? Nassuertariaqarpugut oqarluta: immitsinnut taamaattunngortippugut, alla piunnaarlugu pisuutitsineq malersuunnerlu.
Inuiaat nukittuut pilersikkumallugit qanoq alloriarnerit tulleriiaassavagut? Kikkunnut saassaagut? Sorliit siulliutissavagut? Qanoq aaqqissuussineq ilusilersussavarput? Aallartiffissagut tassaapput angajoqqaat, angajoqqaanngortussallu. Aanaakkut aataakkut inuunermik peqqinnartumik misilittagalippassuit ikiuussinnaappata nukippassuarnik tunineqarnissaq naatsorsuutissaavoq. Inuiaammi ikittut iluanni ilaqutariissuseq nalitunerpaavoq pingaarnerpaallunilu.
Inuiaat nukittuut imminnut napatittut, imminnut tatigisut pilersikkumallugit aaqqiissuusisoqarniarli. Naqqarpiaaniit aallartittoqarli, anguniagarmi upperigaanni anguneqarsinnaavoq. Suliassaq annertuvoq, anguaniakkammi qiterivaa nammaqatigiinneq. Aporfilersuinerpassuit piunnaarlugit ilaqarpugut qallunaanik akusaasunik siuaasaqartunillu. Sooq immitsinnut nikassassuugut, immitsinnut atorfissaqartilluta? Inuiaat ikittut annertuumik uummateqarput. Nunartik pillugu, kinguaassatillu pillugit.