Tupinnaqaaq naalakkersuisoqalersimagatta inuiaqatigiittut piginnaaneqarnitsinnik apeqqusersuisunik. Tupinnarnerpaavorlu maanna Naalakkersuisooqataasut, Naleraq, Aningaasaqarnermut Naalakkersuisup saqqummiussaanut akuerseqataallutik pilersimasutut inissisimalermata
Inuiaqatigiit tamarluinnarmik eqqaamalluarpaat Naalakkersuisooqatigiit pilersinneqarmata oqaatsit imartuut kusanangaartut atorlugit inuiaqatigiit neriuummik annertuumik oqariartorfigineqarmata.
Tamakkuli maanna piviusuunnginnerannik Aningaasanut inatsisissap 2022-moortup saqqummiunnerani Aningaasaqarnermut Naalakkersuisoq, Asii Chemnitz Narup, tusagassiortunik katersortitsinermini ilaatigut oqariartorpoq: Inuiaat Kalaallit qaqugorsuarmut namminersulernavianngillat.
Tunngavilersuutiginiagaa tassaavoq, aningaasarsiornikkut inissisimaffiup pitsanngoriaateqarnissaa Naalakkersuisut naatsorsuutiginngimmassuk.
Siumuminngaanniit erseqqissaatigissavarput, nunarput 2009-mi Namminersorluni Oqartussaanermut ikaarsaarmat, inuiaat Kalaallit amerlanerussuteqarluartut akuersaarnerannik tunngavilerneqarsimasumik, tamannalu uagut upperigatsigu apeqqusersunngilarput.
Siumumit isumaqarpugut, Naalakkersuisut maanna atuuttut namminersulernerup qanoq siunertaqarneranik isumassaqartitsinnginnerat pissutigiinnarlugu, Inuiaat Kalaallit namminersornerat apeqqusersorniarsarineqassanngitsoq.
Namminersorneq pillugu Inatsimmi suliassat suuneri erseqqissumik allattorneqarsimapput, taakkulu tikitserlugit Naalakkersuisut sulisussaapput – soorunami! Siumuminngaanniillu naatsorsuutigilluinnarparput tamanna Naalakkersuisunit ilisimaneqartoq.
– Tupinnaqaaq naalakkersuisoqalersimagatta inuiaqatigiittut piginnaaneqarnitsinnik apeqqusersuisunik. Uagut upperaarput namminersorneq naammassillugu suliarisinnaagipput sapinngitsugullu. Qularutigineqarsinnaanngilarli innuttaasut akornanni nukillaarsaalluni ingerlaleraanni, suliassaq ingerlalluarnerulernavianngimmat, Siumup siulittaasua, Erik Jensen oqarpoq.
– Ingammik naalakkersuisoqalersimagutta isumaqartunik, Namminersorneq pillugu Inatsisip siunertaanik inuiaqatigiittut naammassinnissinnaanngitsugut. Inatsisip qanoq naammassillugu suliarineqarnissaanik Naalakkersuisut isumassaqartitsinngikkunik, naatsorsuutigaarput tamanna inuiaqatigiinnut Inatsisartunullu apuutissagaat. Tupinnarnerpaavorlu maanna Naalakkersuisooqataasut, Naleraq, Aningaasaqarnermut Naalakkersuisup saqqummiussaanut akuerseqataallutik pilersimasutut inissisimalermata. Taamaattumik isumaqarpugut innutaasut – aammalumi Inatsisartut – tamatuminnga paasitinneqarnissaat piaartumik pisariaqartoq, Siumup siulittaasua, Erik Jensen oqarpoq.