Avanersuarmiut Qaanaap kommuniata uterteqqinnissaanut atsioqatigiissutigisimasaat Avannaata Kommuniani kommunalbestyrelsimi eqqartorneqarnissaanut siunnersuuteqarsimavunga, imalu siunnersuutiga tunngavilersorsimavara. Pissutsit tamaanga killeqartariaqalermata.
All.: Ane Qujaukitsoq, Avannaata kommuniani Kommunalbestyrelsimut ilaasortaq, Siumut
Inuiaqatigiit Inugguarnik imminnut taasut innuttaaqatitik nunartillu nammineq inerisaaffigalugillu sullikkusuppaat. Salloqittarneqartuarneq neriorsulussinnarneqarneq innuttaasunut sunniuteqarnera tamaanga killeqartikkusuppaat.
Tamatta nalunngisatsitut Avanersuaq kitaanut sanillersuuneqarsinnaanngilluinnarpoq; inooriaatsikkut, oqaatsitigut, nunap sumiiffiup inissisimaneratigut, piniarnikkut aalisarnikkut kulturikkullu. Sumiiffik nammineq kinaassusilik ICC-mut peqataatinneqarnissaminut pingaarutilerujussuaq, Avannaata Kommuniani ilaasortaatinneqartumit peqataatinneqarani malinnaatinneqanngilaq.
Ineriartorfissat ujartussavagut
Massakkut Avanersuaq Avannaata Kommunianut ataannaruni ineriartorfissaqanngilaq aamma kommunerujussuit pilersinneranili siuttuusartut kommunimut peqataaleramilli unittoornikuuvoq ineriartornertigut. Taamaappoq aamma siuttuusartunit qaqugumulluunniit ilumoorunneqalernaviarnani ineriartortinniassallugu, kommunerujussuarmut sumiiffik nammineq kinaassusilik Inughuarnik imminnut taasunik innuttaasullu atugaasigut suusupagineqartuassapput neriorsornerlutaasarlutillu.
Soorlu qullersat tikeriarlutik takusatik aallaavigalugit aalajangersueriarlutik, tikeraarfik kingullermi neriorsueriarlutik, akissaarummata piviusunngortissinnaajunnaartaraat neriorsuutitik. Saniatigut Avannaata Kommuniata ataani sulisut sanaartugassanut kissaateqartinneqartartut.
Avanersuarmi innuttaasorpassuit naleqanngitsutut misigipput, qulaaniit aqutsineq kisiat ingerlanneqangaarmat, utaqqiinnalernikut qullersat kissaatinik tusarnaartuunngimmata qaammarsaasuunatillu qulaanit aqutserusuttuummata. Innuttaasut atugaat eqqarsaatigalugit Avanersuaq Avannaata kommunianit aninissaa, Avanersuarmiut peqatigiillutik kissaatigisaat, oqaluuseralugulu akuersissutigineqartariaqarpoq kommunalbestyrelsimi, avanersuup innuttaasuisa amerlanerpaat piumasaat malillugu.
Oqquiffissaqarnissaq
Inissaaleqineq annertooq kinguaariit pingasut maannamut illoqatigiittarnerat iliuuseqarfiginiarneqartaraluartoq ilungersunartuummat Inughuit nammineq kommuneqalerunik iliuuseqarfigisinnaassallugu upperivaat. Avataanit isigineqanngimmat qullersanit, taamaallaallu naalakkersuisoqarfimmiit suliassanngortinneqartut maannamut timitalerneqartarlutik. Assersuutigalugu inuusutut inissiaat, maannamullu ilaqutariinnut illut 2024-mi sanaartorneqartussat.
Massakkut killiffimmi Qaanaaq sanaartugassanik tunineqaraluarpoq 7 procentinik, piviusumilli aningaasat qilersorsimasarnerat peqqutigalugu 5,4 procentimiittarpoq, ukioq 2024 0 procentiulluni, 2025 0 procent aamma 2026 6,6 procent. Oqaluuserisassanik pilersitassanik akuersissuteqartaraluarluni akissaarunneqarlutik ingerlariaqqinneq ajorput.
Kinguariartorneq tamaanga killeqartariaqalerpoq
Taamaalilluni Avanersuaq Avannaata Kommunianut atanermini suliffeqarnikkut iluaqutitaqaraluarluni, pioreersunillu atorluaalluni pilersitsisoqartaraluartoq, innuttaasut sulisartut skateeruteqartartut atugaasigut kinguariarfiusorujussuaq tamaanga killeqartariaqalerpoq.
Namminersornerullutik Oqartussanit tapiissutaasartut tuffissaminnut tuttalertariaqartut innuttaasut oqariartuutigisarpaat.
Avanersuaq kommunerujussuarmut ilanngutinngikkallarnera sanilliutissagutsigu, innuttaasut massakkumut amerlanersaat ilinniagaqarsimasunngorsimapput, imatut paasillugu nammineq ingerlatsinissamut ilisimasallit ilinniarsimassutsikkut qaffariarsimapput taamaattumillu qangamut sanilliullugu namminneq ingerlatsinissaat ernumananngilluinnarpoq.