Innuttaasut uukapaatinneqartut: “Sungiusarneq” piviusumiksorsunnissamut piareersarnerusimava?
All.: Ineqi Kielsen Siumumi Politikkikkut siulittaasup tullia, aamma Ane Lone Bagger, Siumut tunuliaqutaralugu folketingimut qinigassanngortittut
Paasissutissat nutaat Kalaallit Nunaanni januaarimi 2026-imi Danmarkimi sakkutuut ingerlatsinerat
pillugu saqqummiunneqartut apeqqutinik pingaaruteqartunik saqqummersitsipput, qanoq pisoq
suliarineqarneranik aammalu qanoq paasissutissat Kalaallit Nunaanni innuttaasunut
tunniunneqarsimanerannik.
Siornatigut sakkutuut sungiusarnerattut saqqummiunneqarsimasoq maanna takutippaa
piareersarnerit erseqqissut annertuut aammalu sorsunnissamut periarfissaq pillugu
piareersarnerusimasoq. Ilaatigut atorneqarput qaartiterutit aammalu nakorsaqarnikkut piareersaatit –
taakkua nalinginnaasumik atorneqartartut ingerlatsinerni piviusuni, sungiusarnerni
nalinginnaasuniunngitsoq.
Ernumanartoq tassaavoq pisoq Kalaallit Nunaanni isumannaallisaanermut pingaaruteqartoq
taamatut annikinnerusumik saqqummiunneqarsimasoq, piviusumut sanilliullugu.
Akisussaaffiit ersarissarneqartariaqarput:
Naalagaaffiup Danmarkip aalajangiinerit pingaarnerit akisussaaffigai, Naalakkersuisulli aamma
innuttaasunut paasissutissiinermik akisussaallutik.
Taamaattumik ersernerluppoq innuttaasut pissutsit qanoq ilungersunartiginerannik eqqortumik
paasissutissinneqarsimanersut.
Kalaallit Nunaat piviusumik qaffasissumik piareersimaffimmiissimavoq,
sakkutuulersuussinnaanerup aarlerinartorsiorfiani pisariaqartinneqartumik ammasumik
erseqqissumillu paasissutissiisoqarnani.
Tamanna tatiginninnermik innarliivoq aammalu siunissami ersarinnerusumik ingerlatsinissamut
pisussaaffiliilluni.
Kalaallit Nunaat nunarsuarmi pissaanilissuarnik akerleriinnerni qitiutinneqassanngilaq,
minnerpaamillu oqartussaasut innuttaasullu tamakkiisumik ilisimatinneqarlutik
peqataatinneqartariaqarlutik.
Taamaattumik erseqqissumik paasisariaqarpoq:
Kina aalajangerpa pissutsit “sungiusarneq”mik taaneqassasut?
Naalakkersuisut qanoq ilisimasaqarpat, qaqugukkullu?
Siumut: Piffissanngorpoq allannguinissamut
Siumut Folketingimi ilaasortaatitaqalissappat, sulissutigissavarput sinaakkutit
allanngortinneqarnissaat, taamaalilluni Kalaallit Nunaat siunissami taamatut pisoqarnerani
tamakkiisumik peqataatinneqartassasoq.
Sulissutigissavarput ammasumik ingerlatsineq annertunerusoq, Kalaallit Nunaata sunniuteqarnerata
piviusunngortinneqarnissaa aammalu Naalagaaffeqatigiinnermi naligiinnerusumik inissisimanissaq.
Kalaallit Nunaat pillugu oqallittoqartillugu Uagut oqalussaagut.
Pisariaqarpat sulissutigissavarput misissuinermik arlaannulluunniit attuumassuteqanngitsumik
akisussaaffiit ersarissarneqarnissaannik aallartitsisoqarnissaa.
Kalaallit Nunaat sorsunnissamut aarlerinartorsiorfimmut inissinneqassanngilaq, innuttaasut pissutsit
qanoq ilungersunartiginerannik minnerpaamik aamma ilisimatinneqartariaqarput. Matumanilu
suliap ilungersunassusaata ersersippaa piffiit inoqarfiusut sakkutooqarfiunnginnissaat qanoq
pingaaruteqartigisoq.