Killilersorneqarani oqaaseqarsinnaaneq pingaarutilerujussuuvoq, aamma taamaappoq tamanut sullissisussaatitaasumik inuiaqatigiittut tusagassiorfiuteqarneq. Maanna kikkut tamarmik KNR aqqutigalugu oqariartuutsinik politikimut tunngasunik oqariartuuteqarsinnaanngorput, akiliuteqarsimagunik naammalluni
All.: Inga Dóra G. Markussen, Siumumi siulittaasup tulliata aappaa aamma KNR-ip siulersuisuinut ilaasortaasimasoq
Ippassaq paasivarput, KNR-i video atorlugu oqariartuutsinik politikimik imalinnik tigusisinnaanngorsimasoq siammarterisinnaanngorsimasorlu. Tamanna saqqummerpoq nutaarsiassaqartitsivik Sermitsiaq.AG ima qulequtalimmik sammisaqarmat: Politikkikkut oqariartuutigineqartut KNR-kkut aallakaatinneqarsinnaanngorput.
Pineqartup aallaavigaa soqutigisaqaqatigiiffiup Ocean Northip videoliarisimasaa naatsoq atasinnaasumik qaleralinniartarnermut tunngatinneqartoq, kingorna aallakaatinneqarnissaa Naalakkersuisunit itigartinneqartoq.
Pineqartoq pingaarutilinnik marlunnik aporfissartaqarpoq.
Siullermik, videup politikimik imaqarnera pissutigalugu Naalakkersuisut pisussaasorisimagamik KNR-imut peersitseqqusillutik inassuteqarsinnaallutik. Tassani tunngaviusumik isummerfissaq tassaavoq, Naalakkersuisut aallakaatitassanik piiaasinnaasoralutik KNR-imut inassuteqarsinnaasorisimanerat.
Aappaattut, KNR-i Naalakkersuisunut aperisussaasoraluni saaffiginnissuteqarsimammat, ilumut KNR-i nammineq aallakaatitassiarisimanngisaminik aallakaatitsisinnaanersoq apersuutigalugu. Tamatuma KNR-imi aqutsisut annertuumik qajannarsisippai, piginnaasaqarnerat ilanngullugu apeqqusersornartilerlugu.
Tamarmillu sulianut toqqaannaq akulerutinnginnissamut annertuumik innarliipput.
KNR-ip nammineq aallakaatitassiarisimanngisaasa akornanni suut aallakaatinneqarsinnaanersut Inatsimmi ersernerlullutik inissisimasimappata, taava apeqqut Inatsisartuni qaqinneqartariaqarpoq. Radiukkut tv-kkullu aallakaatitsisarneq pillugu Inatsisartut Inatsisaat nr. 7, 8. juni 2014-imeersoq erseqqissuliunngilaq. Taamaakkamilu Ombudsmandeqarfiup Naalakkersuisut uparuarpai oqarluni, inatsit atuuttoq naapertorlugu piginnaatitsissuteqartoqanngitsoq, videukkut aallakaatitassat politikimik imallit inerteqqutiginissaanut.
Inuiaqatigiit ammasumik demokratiimillu tunngaveqarlutik ingerlasut illersorniarlugit inatsit erseqqinnerusunngortinneqartariaqarpoq. Pingaartumik salliullugu suliassaagunarpoq, KNR-i tusagassiorfittut tamanut kiffartuussisussaatitaanera erseqqissassallugu, aamma suliassarinngikkaa innuttaasut sinnerluta qanoq oqariartortoqarneranik nakkutilliisutut inissisimanissi.
Illuatungaatigulli uunga pissanngilagut, aningaasanik amigaateqanngikkaanni qanorsuaq KNR pisiarineqarsinnaasoq. Assigiimmik tamatta pineqarnissarput minnerpaamik qulakkeerneqarsimasariaqarpoq.
Suliassarlu taanna Inatsisartutta suliassamittut tigusariaqarpaat.