Innuttaasut neriuuteqalerteqqinniarlugit – Tasiilaq ineriartorteqqittariaqarpoq

Kommunalbestyrelse-mi ilaasortutut pingaaruteqartorujussuuvoq oqaatigissallugu Tasiilami nunaqarfittaanilu ineriartorneq uninngasimasoq, sanaartorneq uninngasoq aammalu inissaaleqineq ajornartorsiutit annerpaartarigaat,  innuttaasuni tatiginninnerup neriuutillu annikillisimanerannik kinguneqarpoq.

Innuttaasut illoqarfimmi najugaqartuusut ulluinnarni malugaat pilersaarutit eqquunneq ajortut, sanaartorneq takuneqarsinnaanngilaq, siunissamullu neriuut  qajannaannerulerluni. Tamanna akuersaarneqarsinnaanngilaq. Illoqarfik ineriartortinneqanngippat, innuttaasut namminneq illoqarfimminnut tatiginninnerat qinikkanullu tatiginninnerat annaaneqarsinnaavoq.

Tasiilaq illoqarfiuvoq ineriartornissamut periarfissarpassualik, kisianni politikkikkut sumiginnangaanera pissutigalugu periarfissat taakku atorneqanngillat. Inissiat amigaataammata ilaqutariit inissianik naleqquttunik utaqqisut amerliartorput, inuusuttut illoqarfimmiiginnarniarnerminni periarfissakilliorput, suliffissaaleqinermullu ajornartorsiutit annertusiartuinnarlutik.

Tasiilaq ineriartorteqqinneqartariaqarpoq oqaaseq taanna uteqattaaginnarnagu, iliuutsinik takussutissaqartunik iliuuseqartoqartariqarpoq. Inissialiorneq aallarteqqinneqartariaqarpoq, sanaartorneq takuneqarsinnaalersillugu, aammalu ukiuni qulikkuutaani pilersaarusiortoqartariaqarpoq innuttaasullu takussutissinneqarlutik.

Ineriartorneq tassaavoq neriuut. Illoqarfik ineriartortinneqartillugu innuttaasut takusinnaavaat siunissaq ajunngitsoq meeqqat inuusuttullu najugaqarusulersilugit. Kommunalbestyrelse-mi ilaasortutut piumasaraara Tasiilaq pillugu pilersaarutit innuttaasunut ammasumik saqqummiunneqassasut, aammalu sanaartorneq aallarteqqinneqassasoq.

Inissiat 14-it sanaartorneqarnerat pingaarutilimmik alloriarnerugaluartoq, inissaaleqisut ikangaarmata tamanna ajornartorsiummut matussusiinngilaq. Tasiilami inissialiornerup ukiorpassuarni uninngareersimanerata kingunerisaanik inissiat pisariaqartinneqartut suli amerlanerujussuupput.

Inissaaleqineq eqqarsaatigalugu kontainer-it 40-t Tasiilamut nassiunneqarput. Taakkuli inissiatut taagorneqarsinnaanngillat, tassami piffissap sivikitsup ingerlanerani atorneqartussatut aaqqiissutaaginnarput. Taamaattumik kontainer-it aaqqiissutissaapput ajornartorsiummut qamisaapallannertut, inissaaleqinerup tunngaviusumik ajornartorsiutaa qaangerniarlugu naammanngillat.

Kommunalbestyrelse-mi ilaasortutut pingaaruteqarluinnarpoq oqaatigissallugu inissialiorneq aamma sanaartorneq kisimik pineqarneq ajortut – suliffissat pineqarput, ilaqutariit isertitaat pineqarput, innuttaasullu atugarissaarnissaat pineqarpoq.

Tasiilami sanasut namminersortut amerlasuut ullumikkut suliassaqanngillat imaluunniit piffissap ilaani suliassaaleqillutik. Tamanna inuiaqatigiinnut sunniuteqarpoq, aammalu suliffissanik pilersitsinissamut periarfissanik annaasaqarnerulluni.

Kommune-p sanaartornermut pilersaarutai sanasut namminersortut peqatigalugit ingerlanneqartariaqarput. Suliassat immikkoortunut agguarneqartariaqarput, taamaalilluni suliffeqarfiit mikisut aamma namminersortut periarfissinneqarlutik. Tamanna suliffissaaleqinerup annikillineranik kinguneqartussaavoq, kiisalu lokalimik inuussutissarsiornermik nukittorsaanermik pilersitsisussaaluni.

Sanasut namminersortut illoqarfimmi nukittuffiupput. Taakku atorneqanngippata, illoqarfik nammineq imminut ineriartortinnissaminut periarfissanik annaasaqartarpoq. Taamaattumik sanaartorneq politikikkut toqqarneqartariaqarpoq innuttaasunut suliffissanik pilersitsisoq, namminersortunut suliassanik pilersitsisoq.

Kommunalbestyrelse-mi ilaasortutut piumasaraara Tasiilami sanaartorneq aallarteqqinneqassasoq, sanasut namminersortut pingaarnerpaamik peqataatinneqarlutik. Taamatut iliorluni suliffissaaleqineq annikillisinneqarsinnaavoq, neriuullu innuttaasuni uterteqqinneqarsinnaalluni.

Qinikkatut akisussaaffitta iluaniippoq innuttaasut atugarissaarnissaat qulakkeerneqassasoq. Tamaattumik Naalakkersuisut aamma Kommuneqarfik Sermersooq ataatsimut akisussaaffimmik tigusisariaqarput. Tasiilaq immikkut pilersaarusiorneqartariaqarpoq, aningaasaliissutit aalajangersarneqartariaqarput, aammalu inissialiornissamut sanaartornissamut pilersaarutit piaartumik aallartinneqartariaqarput

Innuttaasut neriuuteqalerteqqinniarlugit politikkikkut aalajangiineq pisariaqartinneqarpoq. Tasiilaq pisinnaatitaaffeqarpoq ineriartornermut, innuttaasullu pisinnaatitaaffeqarput illoqarfimmi siunissaminnik upperinninnissaanut.