Nanortalimmiut nunaqarfimmiortaasalu isumaat ersarereerpoq – Namminerisaminnik kommuuninngorniarnerat Naalakkersuisut suliassatut tigulissuk.
All.: Anders Olsen, kommunalbestyrelsimut ilaasortaq, Siumut
Kommune Kujallermi kommunalbestyrelse isumaqatigiittoq ulloq 14. februar 2024 aalajangerpoq Nanortalimmi nunaqarfittaanilu innuttaasut namminerisaminnik kommuneqaqqilernissaannut apeqqummut tunngatillugu taasitinneqassasut. Tamanna piffissami sivitsortumi innuttaasut oqallinnerannit aammalu atsiornernik katersisoqareerneranit piumasaqarneq ilaatigut pivoq.
Maanna nunatsinni kommunit arlariit kommunerisamik ilusaat allannguuteqartariaqarnerannik kissaateqarnerat aammalu oqallisigineqarnerat annertuvoq, tamannalu aamma Naalakkersuisunit eqqummaariffigineqarneranik kinguneqarluni.
Tamakku tamaasa tunngavigalugit isumaqarpunga Kommune Kujallermi taasititsinissamut immikkut aningaasarpassuarnik atuinngikkaluarluni suliassaq Naalakkersuisunut Kommune Kujallermiit imissutigineqarpat isumatusaarnerpaassasoq – Nanortalimmiummi nunaqarfimmiortaasalu isumaat ersarereerpoq, 70%-it missaat atsiorsimanerat eqqarsaatigalugu.
Taamaammat suliap pilertornerusumik nalorninannginnerusumillu ingerlanissaa eqqarsaatigalugu isumaqarpunga Kommune Kujallermi kommunalbestyrelsip Naalakkersuisunut suliaq suliakkiutigisariaqaraa, nunatsinni kommunit killeqarfii pillugit nalilersuinerup suliaqarniarnerullu ingerlanerini.
Naggataatigut neriuutigaara periusissaq manna akuersaarneqarumaartoq, taamaalilluta qinikkat suleqatigiiffissatsinnik periarfissarsiorutta angusassarput sullitatsinnut pitsaanerussammat.