Innuttaasunut takornarianullu kiffartuussilluarnissaq piumasaqaataavoq

All.: Aleqa Hammond, siulittaasoq, Siumut

Siumup pingaartitarilluinnarpaa nunatsinni angallannikkut innuttaasunut takornarissanullu kiffartuussilluarnissaq, taamaammat qaammatini arlalinngortuni angallannikkut unammilligassat aqqusaarneqartut ilungersunarluinnartutut iliuuseqarfigineqartariaqartullu nalilerlutigit.

Nuummi mittarfimmi siuleriiaartarneq, timmisartuussinissat uninnerisigut unnuiffissaaleqinerit, nassiussat sivisoorsuarmik tikikkuminaattarneri, billetit ingerlaffinni aaliangersimasuni akitsupiloorneri, takornarissat siulliunneqartarneri, nunaqavissut angallataasa atorneqarneri tunulliunneqartartut, sulisussaalatsineq tassaapput piffissami kingullertigut aasaanera angallannerinnarmi isigisat arajutsisimanngeqisagut. Siumup siulittaasuata Aleqa Hammondip Air Greenlandip pisortaa Jacob Nitter ataatsimeeqatigaa, uani ajornartorsiutit angallattunut ilungersunartutut nalilikkat oqaloqatigiissutigineqarput.

Siumut isumaqarpoq mittarfittaarsimaneq tassaassasoq tamanut iluaqusiisoq, tassa angallannikkut eqaallisaaneq, tikikkuminarsarneq, sukkasuumillu ornitamut tikikkasuarsinnaaneq. Paasisinnaavarput Ilulissani mittarfissuup atulinnginnerani Nuukkooqqaartariaqarneq, taamaattoq allat aporfiit utaqqissuttariaqanngitsutut nalilerlutigit ilungersorluta aaqqiigasuarnissamik suleqatiserinnippugut.

Siumup naalakkersuinikkut sulinermini nuna ataatsimut isigineqarlutik innuttaasut sumiikkaluartulluunniit naligiimmik kiffartuunneqarnissaat angutserlugu sulinini ilungersuutigissuaa.