FN-ip inunnut innarluutilinnut ulluanni, decemberip pingajuanni, inuit innarluutillit pillugit siuarsaaqataanissamik inassuteqarpoq. Ulloq taanna immikkuullarissumik tapersersuinissamut pisariaqartitsinermik ersersitsivoq, soorlu inunnut ataasiakkaanut ikiuinermut, pisinnaatitaaffinnik ersarissumik paasinninnermut kiisalu inatsisit atuutsinnerat eqqortumik ingerlanneqassasoq. Ilutigisaanik inuiaqatigiittut suleqatigiilluarnissamut kaammattorneqarpugut, inuit innarluutillit pisariaqartitaminnik ikiorserneqarnissaat qulakkeerniarlugu aamma inuttut ataqqinartumik inuuneqarnissaat periarfissaqartinniarlugu.
All.: Paarnannguaq Mathiassen, siulittaasoq, Siumut Ilulissat
Ullumikkut ulloq 3. december Naalagaaffiit Peqatigiit nunarsuaq tamakkerlugu inunnut innarluutilinnut ullorititaanut atatillugu oqariartuutigerusuppara, inuit innarluutillit inatsisitigut pisinnaatitaaffiisa qaammarsarneqarnissaat, inuiaqatigiit ataatsimoorluta nukittorsartariaqaripput.
Inuit innarluutillit inuttut allatulli assigiinngitsunik pisinnaatitaaffeqarput. Inunnullu innarluuteqartunut inatsisip inuit innarluuteqartut illersorneqarnissaat qulakkeerpaa.
Atugarissaarnerannut, ineriartornerannut siunissamilu ungasinnerusumi periarfissaannut aaliangiisuulluinnarpoq, siusissukkut eqqortumillu suliniuteqarfigineqartarnissaat. Meeqqat atuarfianni atuarnerannut, ilinniagaqarnerannut, sulinerannut kiisalu nammineq imminnut isumagisinnaanerannut – pisariaqassappallu tapersersorteqarnissaannut. Erseqqissaatigissuara suliniuteqarneq inunnut innarluuteqartunut ataasiakkaanut tulluarsagaq pingaaruteqarluinnarmat.
Kommunini ingerlatsiviit inunnut innarluutilinnut suliassaqarfinni sulisut pissaanerujussuarmik tunineqartarput. Innarluutilinnullu sullissineq ukiorpassuarni tusiattumik ingerlajuarsimalluni. Taamaattumik isumaqarpunga ingerlatsivinni nakkutiginninnerit sakkortusineqartariaqartut pisinnaatitaaffiillu inatsisini allaqqasut ersarissarneqarlutillu atuutsinneqartariaqartut, inuit innarluutillit inatsisitigut illersugaanerat qulakkeerumallugu.
Inuit innarluutillit pillugit ilisimasat annertusarneqartariaqarput kiisalu suliniutinik tigussaasunik suliniuteqartoqarnissaa pilersaarusiorlugu suliarineqartariaqarpoq.
Inuit innarluutillit sumiinnersut sulerinersullu ilisimaneqartariaqarpoq. Majoriamillu suleqateqarneq annertusarneqarluni. Minnerunngitsumik pisortat inissianik sanaartornerminni eqqaamasariaqarpaat, taamaalillutillu inatsisitigut aalajangersaasimanertik malillugu ingerlatsilerlutik.
Innarluutillit pillugit inatsisip siunertaa malinneqaruni, innarluutillit pisariaqartitaminnik ikiorserneqartarnissaat pisinnaatitaaffimminnillu eqquutsitsiffiunissaat piviusunngorsinnaagaluarpoq.