Inuit innarluutillit meeqqallu angerlarsimaffiup avataanut inissinneqartartut, inatsisitigut isumannaatsumik sullinneqarnerat toqqissisimananngilaq. Neriuppunga tamatta pisinnaatitaaffitta qulakkeerneqarnissaat pillugit Inatsisartut nutaassat sulilerumaartut
All.: Paarnannguaq Mathiassen, siulittaasoq, Siumut Ilulissat
Inuit innarluutillit sullinneqarneranni inatsisitigut isumannaatsuunissaq amigaateqarpoq.
Inuit innarluutillit inatsisitigut sullinneqarnermi inatsisinik ilisimasalimmik sanileqartinneqartannginnerat, inatsisinillu atuutsitsisussat akisussaaffimminnik eqqummaariffiginnittannginnerat inatsisitigut isumannaatsuunissamut eqqunngitsuliornertut taaneqarsinnaavoq.
Isumaqarpunga Nunatsinni inuit innarluutillit atugaat pitsaanerulersinneqassappata inatsisitigut isumannaatsuunissaq isumaginninnermi suliaqartunit qulakkeerneqartariaqartoq. Inatsisillu atuuttut atuutsinneqartarnissaat qulakkeerlugu.
Ullumikkut killiffipput ilungersunartuuvoq, atukkallu pitsaanerulernissaat suliassaavoq annertooq.
Inatsisitigut isumannaatsuunissaq
Angerlarsimaffiup avataanut meeqqanik inissiisarnerit inatsisitigut isumannaatsuunissaat pingaaruteqartorujussuuvoq, ullumikkullu tamanna amigaatiginarpoq.
Meeqqat angerlarsimaffiup avataanut inissinneqarsimasut aammalu inissinneqartussat inatsisitigut sullinneqarnerminni inatsisinik ilisimasalimmik sanileqartinneqartarnissaat avaqqunneqarsinnaanngilaq. Inatsisinillu atuutsitsisussat akisussaaffimminnik eqqummaariffiginnittarnissaat inatsisitigut isumannaatsuunissamut qulakkeerinnittussaagaluarpoq. Taamaattorli inatsisinik atuutsitsisussat akisussaaffimminnik eqqummaariffiginnittannginnerat inatsisitigut isumannaatsuunissamut eqqunngitsuliornertut taaneqarsinnaavoq.
Isumaqarpunga Nunatsinni meeqqat angerlarsimaffiup avataanut inissinneqarsimasut atugaat pitsaanerulersinneqassappata inatsisitigut isumannaatsuunissaq isumaginninnermi suliaqartunit qulakkeerneqartariaqartoq.
Pitsanngortitassaqarpugut
Ullumikkut killiffipput ilungersunartuuvoq, atukkallu pitsaanerulernissaat suliassaavoq annertooq. Neriuppunga Inatsisartut nutaassat katersuuttalerunik suliassat taamaattut pimoorullugit oqaasertalersorlugillu aallartikkumaaraat.
Pisinnaatitaaffitta qulakkeerneqarnissaanut politikikkut aqutsisussat ersarissuliorsinnaasut pisariaqartippagut.