Ikummatissanik akitsuineq eqqarsaatigilluagaanngilaq
Avannaata Kommuniani Siumup gruppiata ikummatissat akiisa qaffanneqarnerat itigartippaat, tunngavigalugu tamanna innuttaasunut inuussutissarsiortunullu avannarpasinnerusumiittuusunut annertuumik aningaasarsiornikkut kingunerluuteqarsinnaammat. Gruppip tikkuarpaa, Nunatta avannarpasinnerusortaani innuttaasut ikummatissanik atuinerunerat, tamarmik sumiiffimmi pissutsinut aamma silaannaap pissusaanut tunngassuteqartut, kiisalu akissarsiat eqqarsaatigalugit naammaginanngitsumik inissisimasoqareersoq.
All.: Jakob Petersen, Avannaani Siumup gruppiani siulittaasoq
Avannaata kommunia nunatta avannaaniippoq tamatumalu kingunerisaanik ilisimaneqarpoq avannaani ikummatissanik annertuumik atuisuupput tassami issittumiippugut avannaani aalisartorpassuaqarpoq ilaatigut isorartuumik angalanikkut inuussutissarsiornermik ingerlatsisarput taamaattumillu ikummatissamut annertuumik aningaasartuuteqartarlutik taamaattumillu ikummatissanik qaffaaneq annertuumik aningaasartuuteqarnermik kinguneqassaaq tamannalu aningaasarsiornermut sunniuteqarnerlussaaq.
Aammattaaq eqqaamaneqassaaq sulisartut akissarsiaat tiimimut akit eqqarsaatingalugit annertunngillat aammalu pissutsinut malinnaanngittutut taasariaqarput tamannalu aamma sunniuteqarpoq maanna sulisussaaleqinerup atuunneranut taamaattumillu sulisartut ilungersortut akiliisinnaassuseqarnikkullu killissarpiamiittut suli annertuumik iluangersortinneqassapput, taamaattumik akuerinngilarput ikummatissanut akinik qaffaaneq. KNI sinneqartoortarpoq tamannalu polaroilip sinneqartoorneranik annerpaamik tunngaveqarpoq taamaattumik sinneqartoorneq taava sooq inuiaqatigiit suli annerusumik akilersuisinneqalernerannik kinguneqassava?
Allatigut akitsuineq pilersinnaavoq
Ikummatissanik akitsuineq aarlerinarpoq aamma allatigut akiliinerulernissamik kinguneqarnissaa takusareerparpummi akittuisoqaraangat ingerlatseqatigiiffiit allat aamma akittuisarput aamma nukissiorfiit qaffaasareerpoq tamannalu avannaani kaperlattartumi annertuumik akitigut malunnaateqartarpoq avannaanimi sivisunermik ulluungaluarpat unnuaangaluarpalluunniit qulliit ikumaannalersarput tamannalu soorunami akisuneruvoq inuuniarnermi, qularnanngilarlu nioqqutissat akiinut qaffakulaqisunut aamma sunniuteqassasoq tassami nunatta ilaani nioqqutissat eqqaannarneqartartut uangut nerisaraavut.
Taamaattumik ikummatissanik qaffaaneq avannaata kommuniani Siumut gruppiata akuersaarsinnaanngilaa, aamma isumaqaratta maanna inatsisartunut qinersineq qaangiuteqqammersoq eqqarsaatingalugu qineqqusaarnermi innuttaasunut saqqummiunneqartartut eqqarsaatingalugit naapertuutinngilluinnartumik ingerlatseqatigiiffissuit nunatta pingisai aamma politikikkut ingerlatsinermi sunniuteqarfigineqarsinnaasut taama pissusilersussappata tamanna akuersaarneqarsinnaanngittoq isumaqaratta.