Allattoq: Siumut Folketingip allattoqarfia
Sapaatip akunnerani kingulleq ataatsimiiffiunngereersoq Siumut Folketingimi maanna pisunik nutaarsiasseeqqippoq.
Sapaatip akunnera aallarnerlugu danskit isumaginninnermut ministerianik Pernille Rosenkrantz-Theil-imik Socialdemokratimeersumit Folketingimi ilaasortaq Aki-Matilda Høegh-Dam ataatsimeeqateqarpoq.
Isumaginninnermut ministeriaqarfimmi ataatsimeeqatigiipput, tassani aningaasanut inatsisissamut isumaqatiginninniarnerit aallartinneqartussat sioqqullugit ataatsimeeqatigiinnerulluni.
Siumut Folketingimit pingaarnertut piumasaqaatigut tassaapput:
- Kalaallit Danmarkimi Inatsisitigut Isumannaatsuunissaannut aningaasaliisoqassasoq
- Kalaallit meeqqartaasa angerlarsimaffiup avataanut inissinneqarsimasut kinaassutsiminnik attassiinnarnissaannut aningaasaliisoqassasoq
Aki-Matilda Høegh-Dam Københavnimi seminarertoqarneranut peqataavoq.
Kiniiserit Danmarkimi aallartitaqarfiata aaqqissugaanut ’The 20th CPC National Congress and China—China’s development from a global perspective’-mut peqataavoq.
Seminaareertoqareersoq nereqatigiittoqarpoq, tassani peqataasunik oqaloqateqarnissamut periarfissaqarluni. Kinap partiianit CPC-mit nunanut allanut tunngatillugu suliaqartumik Guo Yezhou-imik aamma Kinap Danmarkimi aallartitaa Feng Tie ilaatigut oqaloqatigai.
Københavnimi Kalaallit Illuutaanni pisortaq Leise Johnsen Christiansborgimut pulaallatsiarpoq pingasunngormat. Kalaallit Danmarkimi ilinniagaqartut inissaannik pilersitsinissamut suliaq sumut killinnersoq oqallisigineqarpoq.
Københavnimi kalaallinut ilinniagaqartunut ilinniartut inaannik pilersitsisoqarnissaanut ujartuisoqarnissaa anguniarlugu danskit aningaasaqarnermut inatsisaanni 2021-mut atuuttumi Siumut Folketingimi aningaasaliinikuuvoq. Kalaallit Illuutaat nalunaarusiornikuuvoq, maannalu ineeqqanik 25-nik kalaallit ilinniartut ineqarfigisinnaasaanik pilersitsisoqarnissaa suliniaqatigiiffimmik suleqateqarnikkut 2024-mi pilersinniarneqarpoq.
Kalaallit Københavnimi ilinniagaqartut ineqalernissaat Folketingimi ilaasortamit Aki-Matilda Høegh-Damimit qilanaarineqarpoq.
”Københavnimi ilinniagaqarlunga Avalammi ilaasortaavunga, tassanilu ilinniartut inissaqarniarnerat ajornartorsiutaasoq takuara. Tamanna saniatigut kalaaliulluni Danmarkimi ilinniagaqartuulluni kiserliornartuusoq aamma malugaara. Taamaattumik 2019-mi qineqqusaarama ilinniartut ineqarniarnerat aaqqiivigineqarnissaa ilaatigut qineqqusaarutigaara”, Aki-Matilda Høegh-Dam oqarpoq.
Aki-Matilda Høegh-Dam Nuummut aallarpoq sisamanngormat, Københavnimut sapaatip akunnerata tulliani utissalluni.