Allattoq: Siumut Folketingip allattoqarfia
Siumup Folketingimi allattoqarfianut aamma Folketingimut ilaasortamut Aki-Matilda Høegh-Damimut sapaatip akunnera qaangiutilersoq pisoqarfiulluarpoq. Christiasborgip iluani avataanilu assigiinngitsunik pisoqarluarpoq.
Sapaatip akunnera aallarnerlugu Danmarkip ministeriuneranik Mette Frederiksenimik apeqqarissaartoqarpoq. Apeqqarissaarnermi Aki-Matilda Høegh-Dam siullersaalluni apeqquteqartuuvoq, tassani ministeriunermut pingasunik apeqqutinik aperinissamut periarfissinneqarluni.
“Qanoq suleqatigiittoqarsinnaava, kalaallit Inuit inatsisitigut isumannaatsuuneq annaakunnaarsillugu aammattaaq meeqqagut kinaassutsiat, piorsarsimassusiat oqaatsillu ataavaarnissaannut isumannaarnissaq angerlarsimaffiup avataanut inissiisarnermut atatillugu?”, Aki-Matilda Høegh-Dam apeqqarissaarnermi aperaaq.
Ministeriuneq Mette Frederiksen akivoq, pingaaruteqartoq immikkut ittumik oqaatsinut tunngasut pissutsit qitiutinnissai.
”Inissiinermi angajoqqaat suleqatigilluarnissaanik ujartorneqassaaq” Mette Frederiksen akivoq, Aki-Matilda Høegh-Damip apeqqutaanut qujalluni.
Kalaallit Nunaata Danmarkimi Sinniisoqarfianut Aki-Matilda Høegh-Dam pulaaqataavoq. Folketingimi Kalaallit Nunaat pillugu ataatsimiititaliaq illu Københavnimiittoq pulaarpaa, tassani folketingimi ilaasortat aqqanillit peqataapput. Sinniisoqarfimmi pisortaq Jens Heinrich suleqataalu pulaarneqarput. Aamma Sinniisoqarfik takornariartinneqarpoq, folketingimi ilaasortat apeqquteqarnissamut periarfissinneqarlutik.
Københavnimi FN-ip illoqarfiani Aki-Matilda Høegh-Dam ataatsimiittoqarneranut peqataavoq sisamanngormat. Ataatsimeeqatigiinneq ‘Annual Nordic United Nations Assembly’-mik taaneqarpoq, tassani nunat avannarliit inatsisitigut suliaqarnikkut unamminartitaat, misilittagaat kiisalu suleqatigiinnissamut periarfissaat eqqartorneqarput.
Tassani peqataareerami Aki-Matilda Høegh-Dam Christiansborgimi allaffimminukarpoq. Tassami Australiamiut Danmarkimut aallartitaa, Kerin Ayyalaraju, ataatsimeeqatigaa.
Ulloq ulapaarfiusoq naggaserlugu Danmarkip Politiivisa aqutsisoqarfiat aamma Direktoratet for Kriminalforsorgen ataatsimeeqatigaa.
Sapaatip akunnerani aggersumi ataatsimiittoqassanngilaq, taamaattumik Folketingimit nutaarsiassiisoqaqqissaaq februaarip 24-ani. Suliassanut aggersunut pilersaarusiornermullu allattoqarfimmit sapaatip akunnera aggersoq sulissutigineqassaaq.