All: Aqqa Samuelsen, Kommune Qeqertalimmi kommunalbestyrelsimi Siumut gruppiani siulittaasoq
Eqqakkanik suliaqartarnermut ataatsimoorluni unammillernartitat aaqqiiviginiarlugit kommunit ulloq 21. januar 2019 ataatsimuulerput kommunillu ataatsimoorlutik eqqakkanik suleqatigiiffiat ESANI A/S (Eqqaavilerinermut, Sulisoqarnermut, Atoqqiinermut Nukissiuuteqarnermullu Ingerlatseqatigiiffik) pilersillugu.
Kommune Qeqertalimmi ukiumut eqqakkat 3.500 tonsit missaannik oqimaassusillit iginneqartarput. Eqqakkat taama amerlanngitsigisut kommunip massakkut ikuallaaviani kinguneqarluartumik aamma avatangiisinik illersorneqarsinnaasumik suliarineqarsinnaanngillat. Kommunit allat ajornartorsiummik assingusumik peqarput.
Kommunit ataatsimoorlutik eqqakkanik suleqatigiiffiata ESANI A/S maangamut naammassisai Kommune Qeqertalimmi kommunalbestyrelsimi Siumut gruppiata naammaginngilai. Nammineerluni aningaasaatinut Kommune Qeqertaliup piginneqataassutitut akiliutissai 3,3 mio. koruunit 2021-mi Kommune Qeqertalimmi kommunalbestyrelsip ataatsimiinnerani ulloq 26. august 2021 akuerineqarput.
Eqqaavilerinermut pilersaarut maangamut naammaginngilarput, ersarinnerusariaqarlunilu. Kommune Qeqertalimmi kommunalbestyrelsimi Siumut gruppiata eqqaavilerinermut pilersaarut ersarinnerusumik tigussaanerusumillu suliarineqartariaqartoq piumasaraa.
Aamma Kommunit ataatsimoorlutik eqqakkanik suleqatigiiffiat ESANI A/S atuisunut innuttaasunullu paasititsiniaanerusariaqarpoq. Eqqaavilerinermut pilersaarutip ersarinnerusariaqarnera oqariartuutigalugu, Kommune Qeqertalimmi kommunalbestyrelsip ataatsimiinnerani ulloq 26. august 2021 Siumut gruppia imaqarniliami ilaatigut ima oqaaseqaateqarpoq:
- Inoqarfinni eqqaaviit imaarneqanngitsut imaarneqarnissaannut tulleriissaarinermut pilersaarut tigussaasumik saqqummiunneqartariaqarpoq.
- ESANI A/S-p kommunitsinni innuttaasunut paasititsiniaanissaa Siumut gruppiata piumasarivaa. Paasititsiniaanermi inoqarfinni eqqaaveqarneq pillugu pilersaarutinik saqqummiussisoqartariaqarpoq, ESANI A/S-llu eqqaavilerinermut tunngatillugu qanoq akisussaaffeqarnerminik paasititsiniaasariaqarluni.
- Aasianni ikuallaavik qanoq pilersaaruteqarfigineqarnersoq aserfallatsaaliisoqassanersorluunniit pillugu kommuni qanoq pilersaaruteqarnerminik paasissutissiisariaqarpoq. Siunissami Aasiaat ikuallaaviat allannguiffigineqassappat Aasiaat ikuallaaviata kiassaaneranik atuisut tamarmik qanoq pilersaaruteqartoqarneranik sukumiisumik saqqummiiffigineqartariaqarput.