Ukiuni kingullerni nunatsinni eqqaaveqarfilerineq annertuumik ajornartorsiornarsimavoq, taamalu inissikkiartorneq ilutigalugu inuiaqatigiit nikussaartarsimapput. Misinnarpoq eqqaavilerineq pisariaqanngitsumik sapangittaqattaaripput, qanorlu aaqqiissuteqarnissaq kommunini politikikkut isumaqatigiissutigineq ajuleqqagaat. Naalakkersuisoq akisussaasoq iliuuseqarnerulluni aaqqiissutissarsiornerullunilu aallartittariaqarpoq
All.: Doris J. Jensen, politikikkut oqaaseqartartoq, Siumut
ESANI 2019-imi februaarimi aallartikkami kommunit tamarmik piginneqataaffigalugu siulersorlugulu aallartippaat.
ESANI-p siunertaraa nuna tamakkerlugu ataqatigiissumik mingutsitsinnginnerusumillu eqqaavilerineq ingerlanneqalissasoq. Pingaartumillu igitassat navianarsinnaasut illersorneqarsinnaasumik passutarineqalissasut aamma atoqqinneqarsinnaasut atoqqinneqarsinnaanngorlugit isumagineqartalissasut.
Siunertanut ilaapput nunap tamarmi atorsinnaasaanik Sisimiuni Nuummilu ikuallaavissualiortoqassasoq, taakkulu saniatigut Qaqortumi, Aasianni Maniitsumilu uuliakunik katersuiveqalissasoq.
Inissinnerlunneq
Kingorna kommunit ilaasa aaqqissuussineq akisugilerpasillugu suleqataajunnaarput, maannalu pingaartumik Avannaata Kommunia illersorneqarsinnaanngitsumik eqqaavilerinikkut ingerlatsiniarsarilersimavoq.
Avannaata Kommunia suleqataajunnaarmat, immikkut ittumik ammaannartumik eqqakkanik ikuallaasinnaanermut Naalakkersuisut akuersissuteqartarsimapput, tamannali 2021-p naalernerani atorunnaarpoq. Piffissap ingerlanerani ikuallaaveeqqanik pisiortornissamik kommuni pilersaaruteqalersimagaluarpoq, taakkuli avatangiisinut illersorneqarsinnaasumik ingerlanneqarsinnaanngimmata taakkununnga akuersissuteqartoqarunnanngitsoq Naalakkersuisoqarfik ilisimatitsisimavoq.
Naallu Avannaata Kommunia namminneq periusissiornermigut aaqqiissuteqarnissamik siunnerfeqarunaraluartoq, tamanna pisimagunarani avannaani eqqaavilerinikkut illersorneqarsinnaanngitsumik inissittoqarpoq.
Iliuuseqartoqartariaqarpoq
Eqqaavilerineq pillugu iluatsittumik ingerlatsinnginneq malunnartumik nunaqarfinnuttaaq annertuumik illersorneqarsinnaanngitsumillu sunniuteqarpoq. Tamanna politikikkut aqutsisut akornanni piaartumik aaqqiissuteqarfigalugu iliuuseqarfigineqartariaqalerpoq.
Taamaattumik Naalakkersuisut immikkut ittumik iliuuseqarnissaat pisariaqarpoq, pissutsimmi isigalugit iliuuseqanngitsoortoqarsinnaanngilaq. ESANI avaqqunneqarsinnaajunaarluni nunatsinni eqqaavilerinikkut inissisimalereerpoq, kommunillu tamarmik peqataaffigisinnaasaanik suleqatigiiffinngoqqinnissaa pisariaqarpoq.
Taamaammat isumaqarpunga inissisimaffik aaqqiissuteqarfiginiarlugu Avatangiisinut Naalakkersuisoq suleqataanerulluni aallartittariaqartoq. Taamaanngippat eqqagassat nunaqarfinni illoqqarfinnilu katersorneqartut annertusiartorlutik pissapput.
Taakku peqqinnissamut annertuumik navianartorsiortitsiinnaratik aamma nunatta tusaamaneqarneranut annertuumik innarliisussaapput.