Ataasinngorneq 16. maaji Aningaasaqarnermut Inuussutissarsiornermullu Ataatsimiititaliaq ataatsimiippoq immikkoortut marluk matoqqasumik oqaluuserineqartussat oqaluuseralugit. Siumup piumasaraa immikkoortoq ammasumik oqaluuserineqassasoq, aalajangiinermi akileraartartut aningaasaataannut attuumassuteqartunik aalajangiinerni suut tamaasa innuttaasut soqutigalugillu ilisimanissaat pisinnaatitaaffigimmassuk.
All.: Inga Dóra G. Markussen aamma Dorthe-Marie Mogensen-Fontain, Sermersuummi kommunalbestyrelsimut ilaasortat, Siumup gruppia sinnerlugu
Tamanna borgmesterip kommunaldirektørillu itigartippaat.
Akunnerup affaata missaa qaangiummat borgmesteri kommunip nittartagaani qaatsiartumik oqaaseqarpoq NCD A/S Iserit A/S-mut kattunneqassasoq.
Tamanna borgmesterip kommunaldirektørillu nipangersimasussaatitaanermik unioqqutitsineranut tunngavoq. Borgmesterillu aamma ilumoortup affaanaa saqqummiuppaa. Tamanna Siumup akuerisinnaanngilaa, pisortat aqutsineranni ammasumik akimullu ersittumik tunngaveqarnitsinnut akerliulluinnarmat. Tamanna eqqarsarnartupilussuuvoq ilaasortat immikkoortup matoqqasuusariaqarneranik ilisimatinneqarmata, NCD-mi sulisut sinneri peqqutigalugit immikkoortoq matoqqasuusariaqartoq. Kommunaldirektøri erseqqissaavoq NCD-mi aqutsisut tassani suliunnaartut pillugit paasissutissat saqqummiunneqartussat isertuussaammata. Kommunaldirektøri NCD-p siulersuisuini siulittaasuuvoq.
Borgmesterip oqariartuutaa allaannginnami siumoortumik allanneqarsimasoq, ataatsimiinnerullu naammassinissaa kisimi utaqqineqartoq.
Annertuumik aqutsinerlunneruvoq aqutsisut borgmesteri siuttoralugu tukattunik kommunimi aqutsisut taakkorpiaat pilersitaannik ”saliisoqartoq” suut tamaasa sakkugalugit isikkoqartitsiniartoqarmat.
- Uagut ataatsimeeqataasugut uppernarsarsinnaavarput immikkoortup matoqqasuusariaqarneranik peqqutaasut pillugit oqaaseqartoqarmat.
- Siumumit taamatut oqariartuuteqarnitsinni kajumissaarutigissavarput NCD pillugu immikkoortoq tamakkiisumik avammut saqqummiunneqassasoq ataatsimiinnermi imaqarniliaq ilanngullugu.
- Borgmesterip tulluarissagaluaqaa ilumoortup tamarmiusup oqaluttuarinissaa taamaallaallu tulluarsakkanik oqaaseqarani, tamannami torersaaniapallanneruvoq innuttaasut isumaqalersinniarlugit suut tamarmik ajunngitsumik ingerlasut aqutsilluartoqartorlu.
- Taamaattoqanngilarmi, kommunilu annertuumik ilungersunartorsiortussaavoq akileraartartut aningaasaataannik amerlaqisunik akeqartussamik.
Aajuna Siumup ikinnerussuteqarluni oqaaseqaataa – soorunami isertuussaanngitsoq:
Siumup ikinnerussuteqarluni oqaaseqaataa, imm. 2.
Oqaluuserisassap akuerineqarnissaanut atatillugu Siumup piumasaraa immikkoortoq ammasuussasoq, innuttaasut kommunimi aalajangiisarsimanerit paasisariaqarmatigit.
Siumut isumaqarpoq taarsigassarsinissamik innersuussineq naammaginartumik nassuiarneqarsimanngitsoq, naatsorsuinermi kisitsisit suut tunngaviunersut, soorlu x milliard kronit taakkoqqissaajunersut.
Nykreditip akissutaa Siumumi taarsigassarsinissamik ilimasaarinertut paasinngilarput, Siumumit akuerinngilarput NCD Iserit-mut kattunneqassasoq, saqqummiunneqartut tunngavigalugit, iluamik nassuiarneqarsimatinnagu ingerlatseqatigiiffiup aqutsisuisa siulersuisuisalu suliap ineriartornerani akisussaaffiat suunersoq.
Siumumit erseqqissarneqassaaq meeqqerivinnik atuarfimillu sanaartorneq tapersersoratsigu, NCD-li pillugu ernumassuteqarnerput pillugu allassimasumik oqaaseqarluta.