Aslak W. Jensen ullormiit ullormut atuutsilertussamik Inatsisartunit tunuarniuteqarluni Inatsisartut siulittaasoqarfianut ullaaq allagaqarpoq
Ullumi tallimanngornermi septembarip 23-ani 2022 Inatsisartut ammarneqarneranut atatillugu, Inatsisartunut ilaasortaq Aslak W. Jensen Inatsisartut siulittaasoqarfianut ilisimatitsivoq, ullormiit ullormut atuutsilertussamik Inatsisartunit tunuarniuteqarluni.
Aslak W. Jensenip tunngavilersuutigaa, inuttut atukkani pissutigalugit tunuarniuteqarnissaminik aalajangersimalluni. Aslakip aalajangernera Siumup tusaatissatut tiguaa.
Aslak W. Jensen oqarpoq, ullaaq Inatsisartut siulittaasoqarfianut tunuarniuteqarnini tunniussimallugu, tunuarniullu ullormiit ullormut atuutsilissasoq kissaatigisimagini.
– Inuttut aqqusaarsimasakka pissutigalugit taamak aalajangersimavunga. Aalajangerneq taanna uannut soorunami imaannaanngilaq. Tamanna isumaqanngilaq politiki qimakkiga, kisianni tassa qinikkatut sulinera unitsikkallassallugu aalajangersimavunga, tamannalu ataqqillugu paasineqassasoq kissaatigaara, Aslak W. Jensen oqarpoq.
Siumup siulittaasua Erik Jensen oqarpoq, aalajangerneq ajuusaarnartoq aamma inuk politikikkut piginnaaneqarluartoq qinigaalluarsimasorlu maanna qinikkatut suliunnaartussanngornera uggornartoq.
– Inuk politikimik suliaqarnissamut piukkunnarluartoq qinikkatut sulinerminit tunuarternera uggornarpoq. Siumumili Aslak W. Jensenip kissaateqarnera ataqqillugu tunuarniuteqarnera tusaatissatut tiguarput, annerusumillu oqaaseqarfigissanatigu, Erik Jensen oqarpoq.
Siumup Inatsisartunut ilaasortaatitanut allannguisoqartariaqalerneranut tunngatillugu, Erik Jensen Inatsisartunit sulinngiffeqarallarsimanerminit atorunnaarsitsigallarniarluni Inatsisartut siulittaasoqarfianut qinnuteqarpoq.
Erik Jensen Naalakkersuisut siulittaasuannut tulliuvoq, Naalakkersuisullu siulittaasuat pissutissaqartumik Inatsisartuni najuussinnaanngikkaangat Naalakkersuisut sinnerlugit Inatsisartunut ilaasortatut taasisinnaanngussaaq. Periuseq taanna siusinnerusukkut atorneqartareersimavoq.