Ullumi Inuiattut ullorsiornitsinni tamassi pilluangaaritsi. Ullumikkut ullorsiorfitsinni eqqaasinneqarpugut inuiaqatigiittut ataatsimoornerup ataqatigiinnerullu qanoq pingaartiginerannik, taakkuummata inuiaqatigiittut ataqatigiiffigisassatsinnut tunngaveqarfigisassagut.
All.: Najaaraq Møller, Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliami siulittaasoq, Siumut
Piffimmi uani Naalagaaffinngoraluttuarnitsinni pingaarluinnarpoq nuna tamakkerlugu inuiattut ataasiussusermik misigisaqarfigissallutigu. Ullumikkut nunarsuatsinni pisut pissutaallutik nunarsuarmioqatigiiulluta nalorninartorsiorfimmiippugut, sorsuunnerit pisariaannaaffianni inissisimasoqarmat. Taamaammallu siornatigornit massakkut pissutissaqarluarpugut tamatta maani nunami najugaqartuusugut, inuiaqatigiiusugut kalaallit, naleqartitagut tunngavigalugit ataatsimuussusermik anersaaqarluta immitsinnut pinissatsinnut. Suleqatigiilluarluta.
Aasap pinngortitarsuaq sikkeralersittarpaa, kusanassutsi isinut takutillugu, tipigissuseq naamatillugu piniagassallu inuiannut tunniussortuarlugit. Taamatorluinnarlu ilinniakkaminnik naammassinnittut inuiaqatigiinnut tunniussaqarput, sikkeralernissaminnut piareertut, ilisimasarilersimasanik inuiaqatigiinnut tunniussuinissaminnut nukissaqarluarlutik appakaatilersut, ilikkarsimasaminnik atorluaanissaminnut aallartittariaannaallutik.
Ilinniarnissi nalaani nalunngilara arlalitsigut unammillernartunik aqqusaagaqartarsimassaqisusi, sulisimaqaasi pimoorussillusilu, massakkullu tassa sulerulussimanersi imminut akilerpoq, immissinnut napatissinnaanngorlusi inuiaqatigiinnitsinnut napatitseqataasussanngorlusi.
Ilinniakkassinnik naammassinninnissinni uummammit pilluangaaritsi! Killiffik pingaarluinnartoq anguarsi, taamaammallu immissinnut tanngassimaarutiginissassinnut pissutissaqarluarpusi. Meeqqat atuarfiat imaluunniit Ilisimatusarfimmit allagartartaarsimagussi ullut uku nutaasumik aallartiffissaraarsi periarfissarpassuarnik ulikkaarlusi.
Aasap naasuisa qanortoq inuttut piginnaasassinnik ineriartortuarsinnaanissinnillu eqqaasittarisi. Nutaarluinnarnimmi misigisassaqarfiusussanut appakaattussanngorpusi, pissanganartorpassuarnillu aqqusaagaqalernissassinnik tamanik pitsaanerpaanik kissaappassi. Alapernaassuseq katannagu pigiuarisiuk, sapiissuseq aajaappiaralugulu immissinnut upperiuaannaritsi.
Silarsuarmut nutaasumut appakaannissinnik tamavissi nuannaartillutalu tanngassimaartippatsigut. Siunissaraassi, qularinngilluinnarparpullu sunaluunniit aqqut qineraluarussiuk pitsaasumik sunniuteqartuarumaartusi.
Inuiaqatigiinneq ataqatigiissoq, ataatsimoortoq nukittoorlu pigitigu, tamatta immitsinnut inissaqartitta. Nunap naasui sikkerartut qanortoq inuiannik kusanartunik naatitaqartuarili.
Inuiattut ullorsiornitsinni tamassi ullorsiorluarisi. Pilluaqqigitsilu.