All.: Karl Tobiassen, Inatsisartunut ilaasortaq
Aqutsiveqarfik Uummannami qaleralittassat nunguttut novembarip 8-iani Naalakkersuisunit ilisimatitsissutigineqarpoq, pisassallit aalisarfinnut allanut nuussasut innersuussutigineqarluni. Tamanna atasinnaasumik aaqqiissutaanngitsoq Siumut isumaqarpoq
Aqutsiveqarfik Uummannami angallatinut qaleralittassat pisassiissutigineqarsimasut nungunneqarput, naak angallatit arlalippassuit suli pisassiissutigineqarsimasunik peqaraluartut. Naalakkersuisullu aaqqiissutissatut oqariartuutaat Siumumit akuersaarneqanngilaq, tassami taamaallaat aalisariutit suli pisassallit aalisarfinnut allanut nuuginnarsinnaanerat innersuussutigineqarmat.
Aalisarfimmi pisassat nungunneqarsimanerisa kingunerisaanik suliffissaaruttoqarluni unittuuinnginnissaq siunertaralugu aaqqiissuteqartoqassasoq Siumut isumaqarpoq. Siumullu paasisimavaa, Aalisarnermut Naalakkersuisoq tamatumunnga isumaqataasoq.
Naalakkersuisoqarfik Aqutsiveqarfinnut allanut aalisariarnissamik innersuussuteqarnermini, aqutsiveqarfimmi aalisarfimminnut immersornagit Aqutsiveqarfik Uummannamut immersortassagaamik innersuussinerat Nalunaarutinik Peqqussutinillu unioqqutitsisunngortitsiniaanerat Siumumiit akuersaanngilluinnarparput
Inuit oqallittarfianni pingasunngormat novembarip 10-ani Naalakkersuisoq aaqqiissuteqarniarluni aalisartunut ilisimatitsisimavoq. Aalisartunut pineqartunut ilisimatitsisimanera naapertorlugu, ataasinngorneq novembarip 15-iani (ippassaq) aalisartut sulillutik aallarteqqissinnaanngussapput. Naallu Naalakkersuisoq tusagassiorfitsigoortumik nalunaaruteqartoqarnissaanik aalisartunut neriorsuisimagaluartoq, Siumut ilanngulluni nalunaaruteqartoqarnissaanik utaqqivoq.
Uummannap sulluani unittoortoqarluinnarluni pisoqassanngippat, Naalakkersuisut neriorsuinertik malillugu ingerlassasut Siumup naatsorsuutigaa. Taamaattumik Aalisarnermut Naalakkersuisoq piaartumik aalisartunut pisassat pillugit ilisimatitsissasoq Siumup piumasaraa.