Ilaqutariinni aqqutissioqatigiinneq siammarterlugulu atorluarnerusariaqarparput. Atugarissaarnermut tuniluuttarpoq, aamma iliuutsitta uagutsinnut avatangiisitsinnullu siunniutaat siammartarput.
All.: Paarnannguaq Mathiassen, Siumut Ilulissat
Nunatsinni meeqqat inuusuttullu atugarissaarnissaat inuunerissaarnissaallu qulakkeerniarlugu ataatsimoorluta siunnerfeqartariaqarpugut qanoq ingerlariaqqinniarnerluta.
Meeqqat, inuusuttullu toqqissisimasut, peqqittut, tarnikkut timikkullu nukittuut kinaassutsiminnillu ilisarisimannittut pilersinnissaannut ilaqutariinni aqqutissioqatigiinneq aqqutissaalluartoq isumaqarpunga.
Atugarissaarnermut tuniluuttarpoq, aamma iliuutsitta uagutsinnut avatangiisitsinnullu siunniutaat siammartarput.
Ilaqutariinni aqqutissioqatigiinneq isumaginninnermi sulinermi atorneqarsinnaalluartoq Isumaginninnermi Aqutsisoqarfiup quppernermini allaaserisimavaa. Periaatsip ilaqutariinni ataqatigiimik aaqqissuussaanerat aallaavigaa, tamanna kalaallit ilaqutareeriaasaannut naleqqulluartuusoq isigineqarpoq.
Aammattaaq periaaseq isumalluutinik qitiutitsisoq, tassani ilaqutariit attaveqaatitik ilagalugit, pilersaarusiortussaammata, meeraq imaluunniit inuusuttoq ikiorserniarlugu qanoq iliortoqarsinnaanersoq. Ilaqutariinni aqqutissioqatigiinneq ilaqutariit meeqqallu oqaasissaqaqataanerinik aqqutissiuisartoq, periarfissiisarlunilu siumut sammisumik aalajangiisumik ingerlariaqqittoqarnissaanik isumaginninnermi aqutsisoqarfiup saqqummiussimasaanni atuarneqarsinnaavoq.
Periaaserlu atorluarneqalissappat ukiut tamaasa sumiiffinni aningaasaliisoqartarnissaa qulakkeerneqartariaqarpoq.