Amerikkarmiunik Canadamiunillu Inatsisitigut ataataqanngitsut puigukkat
Saqqummeqqammerpoq inatsisitigut ataataqanngitsut maanna pisortani oqartussat aqqutigalugit
ikiuinermik neqeroorfigineqalernerat, quttatingaarpakka pilluaqquakkalu.
Inuiaqatigiinni inatsisitigut ataataqanngitsut puigukkat eqqartorneqanngitsullu tassaapput
sorsunnersuup aappaani amerikkarmiut Canadamiullu nunatsinni uersagaat. Amerikarmiunik
Canadamiunillu kingoqqisut allatuulli kinaassutsimmut sumullu attuumassuteqarnermut apeqqut
akissutissarsinissaa pisinnaatitaaffigisariaqarpaat. Amerikamiunik kingoqqisut ataatassarsiorlutik
paasiniaasaraluartut iluatitsineq ajorput paasiniaasinnaannermut matut matoqqalluinnarmata,
Amerikkamiinaangitsoq aamma Danmarkip oqartussaaffianiit matoqqammata. Ukiut ilaatigut 60-
70 ingerlareerput, ullorlu manna tikillugu isertukkanut ilaallutik. Amerikarmiunik kingoqqisut
inuiaqatigiinni nipangiussatut inissisimaannarnatik inuiaqatigiittut pisussaaffigisariaqarpagut
inatsisitigut illersugaanissaat ataataminnullu sumullu attuummassuteqarnerminnik
akissutissarsisinnaanissaannut. Siumup Folketingimi suliassaasa pingaarnerit ilagissavaat
apeqqummik qulaajaanissaq Danskit naalagaaffiata suleqataaffigissagaa.
Sorsunnersuup aappaata kingorna 1951-imi isumaqatigiissut illersornissamut tunngasoq Danskit
Amerikarmiullu isumaqatiissutigisimasaat qanoq imaqarsimanersoq issanngunarpoq,
taamaattumillu Siumumiit isumaqarpugut Amerikkarmiunit Canadamiuniillu uersakkat
kinaassutsiminnik arsaagaasimasut minnerpaamik paasiniaasinnaanissaminnik
pisinnaatitaasariaqartut utoqqatserfigineqarsinnaasariaqartullu.
Taamaattumik Siumut isumaqarpoq tamassuma qulaajaavigineqarnissaa periarfissarsiuunnissaalu
folketingimi Danskit suleqataaffigisaannik suliarineqartariaqartoq.