Ulluni kingullerni Nuummi nukissiuuteqarnikkut pisut ernumanarput – Ilumoorsinnaanngilaq illoqarfiup inuttunersaani nukissiuuteqarnikkut taamak qajannartigisumik inissisimaneq pissappat. Naalakkersuisut pisinnaanngippata Inatsisartut ataatsimiititaliaat piaarnerpaamik katersuutitinneqarnissaat Siumumit piumasaqaatigaarput
All.: Vivian Motzfeldt, Inatsisartunut ilaasortaq Siumumilu siulittaasup tullia
Ulluni kingullerni aatsaat taamak attaveqaatitigut ilungersunarluinnartigisumik nunatta inissinnerani, Naalagaaffiup atorfeqartitai kisiartaangajaallutik inuiaqatigiinnut nalunaaruteqartartunngortinneqarput. Maqaasinarluinnartoq tassaavoq naalakkersuinikkut qanoq inissisimasoqarneranik qanorlu pilersaaruteqartoqarneranik qisuariartoqarneq ajormat – nunarput siuttussaarussimasutut inissisimatinneqarnera assorsuaq ernumalersitsivoq.
Maanna paasivarput Nuup eqqaanit Utoqqarmiut Kangerluarsunnguaniit pilersorneqarneq ajalusoormat, sarfalersuutitigut upalungaarsimaneq sillimaniarneq eqqarsaatigalugu qaqugukkulluunniit piareersimasussaq imaaliallaannaq ikinneqarsinnaanngitsoq.
Maanna akunnerpassuit inuit sulisinnaasut sulisinnaannginneranik kinguneqartumik innaallagiatigut qamittooqqaneq misigaarput, tamannami taava inuiaqatigiit aningaasaqarnerannut qanoq kinguneqassava, qanormitaava akeqarpa?
Nuummi pisut, nunattalu sinneranut kinguneqartitsinerluttut, aaqqiissuteqarfiginiarlugit naalakkersuinikkut sulineq pimoorunneqarnerussasoq piumasarput. Suut tamarmik Nuummut katersuunneqarsimanerisa kingunerisaanik sineriak ilanngulluni annertuumik attaveqaatitigut sunnerneqarpoq, Nuummilu innuttaasut 19.000-t toqqissisimananngilluinnartumik atugaqartinneqarput. Maanna qamittooqqaneq aalaakkaanngitsumillu nukissamik pilersorneqarneq ulluni marlunngulersuni piugaluartoq ilisimasagut annerulinngillat, akerlianik ilisimanngilarput ilumut aaqqiissutissavimmik suliaqartoqarnersoq, aaqqiivittoqalernersorlu.
Naalakkersuisut pisinnaanngippata Inatsisartut ataatsimiititaliaat piaarnerpaamik katersuutitinneqarnissaat Siumumit piumasaqaatigaarput. Akisussaasut – minnerunngitsumillu qinikkat – una pisoq iliuuseqarfigalugu ilinniarfigisariaqarpaat. Suliffeqarfiutitta inuit atugaannut attuumaqqissaartumik qularnaarinnilluni naammassinnittussaq pisortaqartariaqarpoq nunatsinni najugaqartumik. Politikkikkut akisussaaffik ersarissumik tiguneqartariaqarpoq – Innuttaasut qinikkaminnik siulersorneqartariaqarput pingaartumik ulluni ilungersunartorsiorfiusuni.