Ilinniartitaaneq nunatta namminiilivinnissaanut nukittunerpaatut suliniutaavoq

all.: Ineqi Kielsen, Siumumi politikkikkut siulittaasup tullia aammalu Folketingimut qinigassanngortittoq

Nunatta siunissaa pillugu oqallikkaangatta, aalisarnerup ineriartortinneqarnera, aatsitassat, naalagaaffimmit ataatsimoortumik tapiissutit aammalu geopolitikki eqqartukkajuttarpagut.

Kisianni namminiilivinnissamut suliniut nukittunerpaaq allamiippoq.

Taanna tassaavoq ilinniartitaaneq.

Namminiilivinneq politikkikkut anguniagaannaanngilaq. Piginnaasanik ineriartortitsineruvoq.

Inuiaqatigiit namminersorlutik nukittuutut inissisimassappata, nammineq inatsisilerituut, aningaasaqarnermik ilisimasallik, nunanut allanut attaveqarnermi sulialit, ilisimatusartut, ilinniartitsisut aammalu peqqinnissaqarfimmi sulisut pigissavaat.

Taamaattumik ilinniartitaanermut aningaasaliineq inuiaqatigiinnut politikkimik ingerlatsinerinnaanngilaq. Naalagaaffimmik pilersitsiartornermut aqqutaavoq.

Ullumikkut kalaallit ilinniartut Danmarkimi bacheloritut ilinniarnernut isersinnaapput 6.0-regel-imik taaneqartartoq aqqutigalugu. Isumaqatigiissut taanna pingaaruteqartorujussuuvoq. Piumasaqaatit appartinneqarnerannik pissuteqanngilaq, kisianni ilinniartitaanermut aaqqissuussinerit assigiinngissutaannik ataqqinninnermik ersersitsivoq.

Taanna periarfissaq illersorneqartariaqarpoq aammalu nukittorsarneqartariaqarpoq.

Peqatigitillugu qulakkeertariaqarparput, Ilisimatusarfik akademiskimik akuersaarneqarnermik tamakkiisumik piumasaqaateqanngitsumik angusaqassasoq. 6.0 regel-ip assigisaanik Ilisimatusarfimmi bachelortitut naammassisimasut danmarkimi ilisimatusarfinni kandidatitut aallartinnissaannut periarfissamik ujartuinissaq, Siumup folketingimi sulissutigissavaa. Taamaaliornikkut kalaallit immikkut ittumik kandidatitut ilinniagaqartut nunatsinniittut amerlisarsinnaaqqullugit.

Nunatsinni bacheloritut ilinniarsimasut Danmarkimi ingerlaqqiffiusumik ilinniarnissamut qinnuteqaateqarnerminni aporfissanik pisariaqartinneqanngitsunik nalaataqassanngillat.

Naalagaaffeqatigiinneq ataqqinninnermik tunngaveqartoq isumaqarutta, taava kalaallit ilinniartitaanermut ingerlatsiviinut ataqqinninneq aamma atuuttariaqarpoq.

Ilinniartitaaneq aningaasaqarnikkut ineriartortitsinermut aamma matuersaataavoq.

Nuna namminersulernissaminik anguniagaqartoq nammineq aningaasaqarnikkut aaqqissuussinernik aqutsisinnaasariaqarpoq, nunani tamalaani isumaqatiginninniarnerni peqataasinnaasariaqarpoq aammalu nammineq niuernernik maleruagassiorsinnaasariaqarpoq.

Tamanna piginnaasanik pisariaqartitsivoq.

Taamaattumik ilinniarnermik naammassinninnerup kingorna angerlarnissamut ajornannginnerulersitsisariaqarpugut.

Ilinniarfimmiit sulinermik inuussutissarsiuteqarneq tungaanut ikaarsaariarneq nunatsinni nukittorsarneqartariaqarpoq.

Suliffeqarfiit ilinniartunik praktikkertitsinissamut kajumissaarneqartariaqarput.

Aammalu inuusuttut piginnaasaminnik pisariaqartitsisoqartoq misigissavaat.

Ilinniartitaaneq aningaasartuutaannaanngilaq.

Aningaasaliissutaavoq sivisuumik iluaqutaasussaq pingaarnerpaaq.

Nunatta nunarsuarmi siunissami inissisimaffissaa pillugu oqallikkaangatta, apeqqut ataasiinnaq aallartissutigisariaqarparput:

Inuit akisussaaffimmik tigusisussat pigivagut?

Akissut tassaassappat aap, ullumi aallartittariaqarpoq.