Siumut sermersooq atsioqataavoq

Kommunalbestyrelse ataatsimiinnerani ulloq 3. december 2026 aningaasatigut ukiumut 2026-imut aappassaarinermi Siumut akuerseqataavoq taamaasillunilu isumaqatigiissummut atsioqataalluni.

Nuannaarutigaarput Siumut gruppi isumaqatiginninniarnermi peqataanerminni angusaqarluarluta atsioqataagatta.

Siumumiit pingaartilluinnaratsigu innuttaasut atugaat aammalu sullissineq innuttaasunut pitsanngorsartuagassaq tikuuttuaratsigu.

Kommuneqarfik Sermersooq tamakkiisumik isigalugu ineriartortuarnissaq angusaqarfigerusuttaqaarput. Taamannalu anguniakkatsinni pingaarluinnartuusoq oqaatigerusupparput. Ukiorpassuarni Nuuk ineriartortuarsimavoq inissaminiipporlu tamanna, taamaattumik tulattarfeqarnikkut suliniutit pingaaruteqarluinnartut Nunatta ineriartoqqinnissaanut Siumumiit naalakkersuinikkut aqqutissiuunneqartut taperserlugittaaq Qeqertami ineriartortitseqqinnissaq atsioqataaffigaarput.

Nunaqarfiit

Nunaqarfinni inuuneq nukittorsarusullugu aammalu kangiani nunaqarfiit ineriartorfiusut takusinnaallugit aalisarnikkut siunnerfeqartuni ingerlalluarnissaat sinaakkuserluarumallugu inissaqarniarnikkut anguniartuarparput annertusaanissaq.

Taamaasilluta Iserit a/s aqqutigalugu inissialiortiternissat 5. millioninik kr. aningaasaliiffigineqarnerat peqataaffigaarput ukiunilu tulliuttuni annertusaqqinnissaat Siumumiit siunnerfigalugu. 

Anartarfeqarnikkut peqqinnissamullu siuarsaataasussanittaaq akitigullu allannguivugut, Nunaqarfinni atugassarititaasut ulluinnarnilu inuunermut pitsanngorsaataasussat siunnersuuteqarnitsigut allannguiffigaagut akiliutaasartoq apparneqarpoq, taamaasilluni inuuniarnikkut oqilisaataasinnaasunik pitsanngorsaataasunillu allannguivugut.   

Ineqarneq

Inuuneq toqqissisimaffissaqartoq anguniakkatsinniipportaaq, taamannalu Nuummi inissaaleqineq annertunera innuttaasullu pisariaqartitsinerpaat inissamik tunineqarsinnaanissaat aammattaaq pingaartilluinnarparput. Akitigut naleqquttunik innuttaasunit akilerneqarsinnaasunit inissiaqarnissaq anguniarneqartuartariaqarmat. Nuummilu inissaaleqineq akiorniarluguttaaq ukiumut Iserit a/s aqqutigaluguttaaq 50. mio kr aningaasaliiffigineqarput.

Paamiuni inissiarsuit piiarneqartut amerlaqaat ukiuni makkunani, taamaattumik taartissaannik nutaanik aningaasaliivugut ukiuni pingasuni 40. mio kr Iserit a/s aqqutigaluguttaaq sanaartorneq ingerlanneqarumaarluni. Ineriartorneq aallartisaqqinneqartariaqarpoq, inissiallu toqqammaviupput maanna ineriartornissamut akimmisaarutaasut. Illoqarfiup avataaniimmi allaallumi innuttaasut Paamiuniiittunut inissaaleqineq atuummat. Iliuuseqarfigaarpullu tamanna.

Assinganillu Tasiilami inissialiorneq nangeqqillugu ukioq mannattaaq Iserit aamma aqqutigalugu 10,5 mio. kr-ninik aningaasaliiffigineqarpoq.

Innarluuteqartut atugaat

Uani isumaqatiginninniarnermi Siumumiit pingaartipparput innarluuteqartut kommunetta avataani inissinneqartariaqarsimasut kommunetta iluani angerlartinnissaannut periarfissanik ujartuinissaq.

Aammattaaq pingaartilluinnarparput ukiumut angalasarneq ataasiusoq ilaqqillugu angalasinnaanissamut qinnuteqarfiusumik 2026-imut aningaasaliissuteqaratta. Taamaasilluni ukiumut angalasinnaatitaanerup saniatigut angalanissamik ataatsimik qinnuteqarsinnaanngortillugit.

Inooqataaneq pingaarnerpaatut inuiaqatigiit akornanni iserfigiuminartuunissaa siunnerfiit annersaat ilagaat. Pitsanngorsaasuarnissarlu Siumumiit qularineqassanngilaq ingerlanneqarumaartoq.

Taamaattumik Siumumiit anigaasanut inissiineq 2026 annertuumik piumasatsinnittaaq inissaqartinneqarnera nuannaarutigaarput. Taamaasillutalu akisussaaqataalluta

Siumut Sermersooq sinnerlugu

Dorthe-Marie Fontain