Nunatsinni peqqinnissaqarfiup annertuumik pisariaqartitsinerani, sinerissami nakorsiarsinnaanerup erngertumik iliuuseqarfiginissaa pisariaqarluinnarpoq.
Maannamut Naalakkersuisut Naalagaaffik peqatigalugu isumaqatigiissusiortarnerat siunertaqarluaraluartoq pingaarnersiuinissaq pingaaruteqarluinnarpoq, sinerissamilu pisariaqartitsineq immikkut sallertullu maluginiagassaalluni.
Naak isumaqatigiissutit siunertamikku kusanaraluartut iliuuseqarnissaq erngertumik nunatsinni pisariaqartoq Siumut isumaqarpoq. Najukkani inuup inuunera navianartorsiortillugu innuttaasut najukkaminni ikiorserneqarnissamik pisariaqartitsipput.
Ataavartumik napparsimaveqarfiit sulisulersornissaat tuaviortumik pisinnaanngippat, taava erngertumik rejseholdenik pilersitsisoqarnissaa pisariaqarluinnarpoq. Peqqinnissaq pillugu Ataatsimiititaliarsuup innersuussutigisimasai aallaavigineqassasut Siumup Naalakkersuisunut kaammattuutigaa, taassumalu saniatigut peqqinnissaq pillugu partiit isumaqatigiissutigisimasaat aamma qimerlooqqullugit.
Taakkuuppummi piffinni ullumikkut iliuuserineqartussanik tikkuussisut tigussaasut, siunissamut iliuuseqarumaarnermik isumaqatigiissutaanatik.