Borgmesterip aaliangernera eqqarsaatigilluagaanngitsoq

Borgmesterip aalajangernera aqutsinermut allaffissornikkullu nalornisoortitsivoq.

All.: Aqqa Samuelsen, kommunalbestyrelsimut ilaasortaq, Qeqertalik

Borgmesterip innuttaasunut nassuiaatai amigarput. Suli paasiuminaallunilu ersarluppoq Kommune Qeqertalimmi borgmesteri kommunip qitiusumik allaffeqarfiani Aasianni najugaqarani Qeqertarsuarmi najugaqarnissaminut aaliangernera – innuttaasunut erseqqissumik tunngavilersueqqaarnani, aalajangiinermullu tassunga inuiaqatigiinnut qanoq kinguneqassanersoq nassuiaateqarani. 

Suli ernumanarneruvoq borgmesterip kissaatigimmagu pisortaaninngortussaq aamma borgmesterip najugaqarfigisaani najugaqalissasoq – tassa kommunip qitiusumik allaffeqarfiani najugaqassanngitsoq. Apeqqutit tulleriit pingaaruteqartut taamaasilluni saqqummerput:

• Aqutsineq qanilaassuseqartoq qanoq qulakkeerneqarniarpa, qitiusumik allaffeqarfimmi sulisut suleqatigiinnerisa pitsaassusaat qanoq qulakkeerneqarniarpa, borgmesteri pisortaanerlu Aasianni sulisunit pingaarnerpaanik ungasillutik najugaqarunik?
• Suleriaatsinut qanoq sunniuteqassava, innuttaasunut kiffartuussinermut, kiisalu sulisut sulianut tunngatillugu qanimut avitseqateqartarnissaannut ikioqatigiinnissaannullu periarfissaat qanoq sunnerneqassappat?
• Annertunerusumik eqqarsaatigineqartariaqarpoq – inuiaqatigiinnut aningaasatigut qanoq kinguneqartussaanersoq, borgmesteri pisortaanerlu kommunip qitiusumik ingerlatsivianiit ungasillutik najugaqarpata?

Tassaanngilaq najugaqarfiusussaq pillugu apeqqusiisugut, aqutseriaasissarli qanoq ittuuniarnersoq apeqquserlutigu. Borgmesteri pisortaanerlu annertuumik akisussaaffeqarput, innuttaasunillu sullissisussatut ileqqorissaarnissamut ataqqinnillutik ingerlatsinissaat naatsorsuutigineqarluni. 

Innuttaasut pisinnaatitaaffeqarput ersarissumik paasinartumillu aqutseriaasiulertussamik nassuiaanneqarnissaminnik. Kommunalbestyrelsip pisinnaatitaaffigaa borgmesterimut aammalu allattoqarfiup aqunneqarneranut piumasaqaateqarnissaminut– tassa borgmesterip qitiusumik allattoqarfimmut qanilaartuunissaanut, kiisalu aqutseriaatsimik pisariitsumik tamanut iluaqutaasussamik ingerlatsinissamut. 

Taamaattumik kaammattuutigaarput borgmesterip tamanut saqqummiullugu nassuiaatigissagaa: Borgmesterip aaliangernera innuttaasunut inuiaqatigiinnullu qanoq kinguneqassanersoq – aammalu aqutsineq naammaginartumik ingerlanneqarsinnaanersoq, kommunip innuttaasuinut tamanut iluaqutaasinnaasussaq anguniarlugu.