Siumut Sisimiut siulersuisuisa ataatsimiinneranit immikkut qutsaviginiarpavut siunnersuuteqartoq Anders Olsen, Inatsisartuni Siumut Gruppia aamma Ineqarnermut Attaveqaasersuutinullu Naalakkersuisoq Erik Jensen.
All.: Evelyn Mølgaard, siulittaasoq, Siumut Sisimiut.
Nuannaarutigaarput Qeqqata Kommunia kiisami kommunini tamani attaveqaasersuutiliornerit annertuut nutaat suliarineqarnerini aningaasaliiffigisarnerinilu ilanngunneqartussanngormat, tamanna Sisimiut Kangerlussuullu akornanni ineriartortinniarlugu suliniummut annertuumut aqqusinniornissamut Namminersorlutik Oqartussanit aningaasaliiffigineqarluni piviusunngortinneqarsinnaanera, qanilliallammat, Ataqqinartunit Inatsisartunit, kiisalu Naalakkersuisunit taperserneqarmat.
Soorunami alloriarneq tigussaasoq siulleq erseqqinnerulerpoq. Tamannalu Siumut Sisimiunit assorsuaq nuannaarutigaarput. Kommunimi ilaasortaasarsimasut ilaasortallu upperilluinnarlugu sulinerat taamaalilluni naqissuserneqarmat suliaareersut saniatigut suli suliaqarnissamut, politikkikkullu anguniakkat ukiorpassuanngortut ilungersuutigineqarunik minnerunngitsumillu upperineqarlutik suliaasimasut isikkunikkiartornerat, ineriartortitsinissamut aningaasarsiorfiusinnaasunillu nutaanik takorluuisinnaanermut Qeqqata Kommuniani ersarinnerulersitsimmata.
Kiffaanngissusermut annertunerusumut aningaasarsiorfiusinnaasunullu suli annerusunut periarfissiineq, minnerunngitsumillu aqqusineq inoqarfiit akornanni piviusunngortinneqarsinnaaneranut sulineq unigani aallarialersoq nuannaarutigeqaarput.
Qujanaq qasusuillusi suliamut suleqataanissinnut taamaalilluni anguniagaqatigiinneq kinguneqarluariartulerpoq.