Nunatta Kangiani inuuneq naallugu najugaqarsimasuulluni, ukiuni kingullerni Kommuneqarfik Sermersuummi pisut isiginnaarlugit assut ilungersunarput. Pingaartumik kommunip ataatsip iluani assigiikannersumik ineriartortoqarnissaanik kissaateqartuarsimalluni takuleratsigu, sunaaffa Nuup ineriartornissaanut Kangia ilanngulluni akilersuisussanngortinneqarsimasoq
All.: Lars Poulsen, Inatsisartunut ilaasortaq
Inuunitsinni sukkulluunniit kukkuluttortoqarsinnaasarpoq, tamannalu inuunermut ilaaginnarpoq. Kukkuluttorsimagaangattalu naatsorsuutigisarparput, tamanna aaqqinniarneqartassasoq.
Kommuneqarfilli Sermersooq killormut ukiorpassuarni ingerlasimasoq ukiuni kingullerni paasivarput. Tassami kialluunniit takusinnaavaa, millionerpassuit inatsisit unioqqutillugit inissialiortitsernernut atorneqartarsimasut. Ajuusaarnarnerpaagunarporlu qulaatigut attartortut maanna atasinnaanngitsumik inissinneqarmata aamma kommuni uagullu inuiaqatigiit tamatta maanna akilerniartussanngukkatsinnik akiligassarpassuaqaleratta: 1,25 milliardit kronit.
Pineqartumut, illuliortitersimanermut tusaamaneqalersumut tunngatillugu, uanga inuttut qisuariartoqarnerunissaanik naatsorsuuteqarsimagaluarpunga. Immikkut maqaasivakka inunnik illersuissallutik suliniaqatigiiffiit nipaarussimammata, naak ukiuni siuliini nappaarittarsimagaluaqisut.
Immikkut Transparency International Greenland uani maqaasivara. Kommunit Nakkutilliisoqarfiata inatsisaatsuliorsimaneq peqquserlussimanerlu Kommuneqarfik Sermersuummut sakkortuumik oqaasertalersuilluni apuuppaa. Pineqartorlu Transparency International Greenlandip ileqqorlunneq pillugu oqaasertalersuisimaneranut eqquunnerusinnaanngikkaluarpoq:
“Peqquserluttuliorneq tassaavoq iluanaarniutigiinnarlugu oqartussaassusiligaanermik atornerluineq. Kikkulluunniit inuunermikkut, pilersorneqarnermikkut pilluarnermikkullu ajoquserneqartarnerat oqartussaasutut inissisimanermik atornerluilluni inuit kiffaanngissusiiarneqaraangata peqquserluttuliorneq pisarpoq.”[1]
[1] https://www.transparency.gl/ka/