Folketingimi Naalagaaffeqatigiinneq pillugu oqallittoqarnerani Siumut tunuliaqutaralugu Folketingimi ilaasortaq Aki-Matilda Høegh-Dam oqalliseqataavoq ullumi tallimanngornermi.
Kalaallit Nunaanni pisortatigoortumik oqaatsit atorlugit Aki-Matilda Høegh-Dam Folketingip oqaluttarfiani oqalugiarpoq. Kalaallit Nunaanni innuttaasut sinnerlugit ilitsoqqussaralugu oqaatsini atorlugit Folketingip oqaluttarfiani kalaallisut oqalugiarniarluni Aki-Matilda Høegh-Dam aalajangernikuuvoq.
Oqallisigineqartorli apeqquserpaa, tassaammammi ”Naalagaaffeqatigiinneq pillugu oqallinneq”.
”Naalagaaffeqatigiinneq piviusuunngilaq. Aatsaat Naalagaaffinngornikkut Naalagaaffeqatigiinneq pisinnaanngussaaq”, Aki-Matilda Høegh-Dam oqaluttarfimmit naqissusiivoq.
Oqalugiarnermini Danmarkip Kalaallit Nunaannut eqqunngitsuliortarneri qaqilerpai. Nunatsinnili innuttaasut alloriaqqilernerat pingaarnertut oqaatigaa:
”Kalaaliusugut immitsinnut uparuarsinnaasaqaagut, aap. Nunani nunasiaataasimasuni tamanna takornartaanngilaq. Taamaattorli upperilluinnarpara aamma nukittuffigut eqqaamasarnissaat pingaaruteqarluinnartoq. Aqqusaakkagummi imaannaasimanngikkaluaqisut taamak nukittutigisunik, naleqqussallaqqitigisunik, tunniutiinnajuissinnaatigisunillu nassaariaannaasoqarneq ajorpoq. Uppernarsaataa aana: Suli tamaaniippugut, Kalaallisut oqaatsivut atorpavut. Nipangersimanngilagut”.
Aki-Matilda Høegh-Damip Kalaallit Nunaata Naalagaaffinngornissaa upperilluinnarpaa. Tamanna Folketingimi ilaasortaqatiminut aamma ammasumik oqaatigaa.
”Takkutilerpoq. Saperata isumaqalersimavugut. Alloriaqqinnissaq tullinnguutilerpoq. Tunuarsimaarnata, saperata, siunissarput sinaakusersussavarput. Allanngortissavarput politikkikkut atuuttoq. Naalagaaffik kalaalliniit kalaallinut”, Aki-Matilda Høegh-Dam Folketingip oqaluttarfianit oqarpoq.