Folketingimi ilaasortaq Aki-Matilda Høegh-Dam aamma Inatsisartunut ilaasortaq Kuno Fencker oqallissaarusiartik qaammammi matumani nassiuppaat. Tassani piumasaraat Issittoq pillugu Aallartitaq Kalaaliusariaqarnera imaluunniit nunap inoqqaajusariaqartoq oqariartuutigaat.
Taamatut piumasaqaateqarneq Socialistisk Folkepartimiit Kalaallit Nunaat pillugu oqaaseqartartup isornartorsiorneqarpoq. Piumasaqaat ammip qalipaataanik immikkoortitsinerusoq isornartorsiorpaa.
”Atorfinitsitsinermut tunngatillugu ammip qalipaataa apeqqutaatinneqartassanngilaq. Ammimik immikkoortitsisarneq aamma immikkoortitsisarneq uagut akerleraarput”, SF-imit Karsten Hønge danskit nutaarsiassaqartitsiviani Altingimi issuarneqarpoq.
Siumup piumasaqaataa Moderatit Kalaallit Nunaat pillugu oqaaseqartartuanit Jon Stephensenimit aamma nuannaarutigineqanngilaq:
”Kalaallinik immikkoortiterisoqartassanngilaq. Kina atorfinitsinneqassanersoq aalajangiinnginnermi immikkoortitsisoqaratarsinnaavoq kalaaleq toqqarneqassappat”, Moderatinit Jon Stephensen nutaarsiassaqartitsivimmut pineqartumut oqarpoq.
Moderatit aamma Socialistisk Folkepartikkut isornartorsiuereermata Aki-Matilda Høegh-Dam partiinut taaneqartunut siulittaasuusunut apeqquteqarnissamut ullumi periarfissani atorlugu apeqquteqarpoq. Taakkumi partiit Siumup piumasaqaataanut isornartorsiuinikuupput.
Suliffeqarfinni ingerlatseqatigiiffiusuni siulersuinikkut naligiissitaasoqartarnissaa, tassa arnat amerlanerusut siulersuinikkut suleqataasalernissaat, Socialistisk Folkepartimit anguniarneqarpoq, tamanna partiip anguniagaani atuarneqarsinnaavoq. Taamaattoq inoqqaariinnut imaluunniit Danmarkimi ikinnerussuteqartunut naligiissitsisoqannginnissaanut atatillugu immikkut iliuuseqartoqassanngitsoq Karsten Høngep oqariartuutigaa.
Taamaattumik Aki-Matilda Høegh-Damip apeqqutigaa, ingerlatsiviit børsini nalunaarsorneqarsimasuni arnanik salliutitsinerunnginnersoq, massa partii aappaatigut isumaqarluni” race tunngavigalugu immikkoortitsinerusoq” Kalaaleq imaluunniit Inuk issittoq pillugu aallartitatut sulilersinneqassappat.
Partiimi siulittaasoq SF-imut, Pia Olsen Dyhr, isumaa allaavoq, parteeqatiminut, Karsten Høngeimut sanilliullugu:
“Oqaaserisamut ilisimasaqanngilanga. SF-ip inuit allat race tunngavigalugu immikkoortissallugit assut mianersuutigisarpaa. Soorunami misissussavara, SF-imi siulittaasoq oqalugiartarfimmiit akivoq.
Lars Løkke Rasmussen oqalugiartarfimmi oqarpoq, politikikkut Moderaterinut siulittaasoq, partii piareeqqasoq alloriaqqissalluni, inuiaqatigiimmi arnanut iluaqutaasussamik, partiip ammaffigaa eqqartussallugu pisassarititanit eqqutinnissaa arnanut aqutsinermi.
Taamaattumik Aki-Matilda Høegh-Dam aperivoq Moderaterne aammattaaq innuttaasut ajattugaasut Danmarkimi naligiissitaanerunissaannut sulissutigissallugu piareersimanersut.
“Uagut anguniagarivarput Danmarkimi innuttaasut tamarmik inuiaqatigiinnitsinni peqataatinneqarnissaat”, Lars Løkke Rasmussen akivoq, aammattaaq akerlerilluinnarpaa parteeqataanut Jon Stephensen kingusinnerusukkut oqaatigisimasaanut issittoq pillugu aallartitaq pillugu oqallinnermi.
Aki-Matilda Høegh-Damip oqalugiartarfimmiit ajornartorsiut qaqeqqippaa, sooq periarfissaanngitsoq Kalaaleq imaluunniit Inuk issittoq pillugu aallartitatut sulilersinneqarsinnaanngitsoq.
– Ullumikkut eqqartukkasi tunngavigalugit innuttaasut illersornissaannut, kikkut tamat oqartussaaqataanerat pingaarnerpaat akornaniittussaagaluarput, tamatta immitsinnut tapersersoqatigiissinnaassagaluarpugut, taamaaliornikkummi aatsaat tassa ataatsimooqatigiinnerusinnaagaluarpugut, Aki-Matilda Høegh-Dam taama oqarpoq.