Kommuneqarfik Sermersooq pillugu oqallinnermut maanna ilanngutilaassaanga. Uani Kangiani, tassa tunumi, oqartussaaffimmik annertuumik arsaarinnissimaneq eqqartorneqartillugu kommuneqarfik Sermersuup ingerlasimaneranut oqaaseqarusullunga.
All.: Dorthe-Marie Mogensen-Fontain, Kommunalbestyrelsimi ilaasortaq Paamiuniit, Siumut
Kommuneqarfik Sermersuummi annertuupilussuarmik Nuuk inituvoq. Aap aamma taamaattussaavoq, tassami nunatsinni illoqarfiit pingaarnersaraat. Allaat ima initutigaaq Nuup avataaniittugut 1.25 mia. kr. atorniarnermi Nuummiinnaq atugassaasuni amerlanerussuteqartut akuersineratigut pilliuteqartitaaleratta. Illoqarfinni mikinerni innuttaasut (innuttaasuusimasut), Nuummi inissaqarniassammata, meeqqeriveqarniassammata, illumik saviminiusumik peqarniassammata atuarfissaarsuaqarniassammatalu. Imak paasineqassaaq illoqarfiit mikinerusuniit Nuummut nutserartitsineq ingerlaniassammat, periusissiaq aqqutigalugu. Asugooq 2030-imi 30.000-inngorumallutik.
Aalajangersimagaannili kommunerujussuaq ingerlatissallugu, tulluusimaarutigalugu isorartunerpaamik kommuneqarneq, taava pisussaaffiliissaaq tamanna eqqortumik ingerlatissallugu.
Ullumikkut kommunerujussuarmi Kommuneqarfik Sermersuumi ingerlatsineq, oqartussaaqataaneq annertuumik naqisimaneqarpoq; Nuup avataani inissisimagaanni. Paamiuni allakkisartutut inissisimavugut. Oqartussaaffeqarata sunnguamilluunniit.
Tasiilaq ajunnginnerulaarpormi, taakkumi peqqinneq sunngiffillu oqartussaaffik tigunikuuaat. Allamilli tigusaqaqqinnikuunngillat.
Unalu ingasagisannuttaaq ilaavoq, aalajangiisartut utoqqaat illuannut nuuttoqassatillugu sullissisut Paamiuni inissisimasut ingerlatitseqqiisariaqarmata Nuummut. Nuummiillu aalajangiinerit ingerlareerpata aatsaat nuuttoqarsinnaalluni.
Taamatuttaaq innuttaasut ikiorsiissutinut qinnuteqartoqartillugu Nuummut ingerlatinneqaqqaartarput. Saaffiginnissullu kingulleq uannut saaffiginnissutigineqartoq ukiup affaa utaqqisinneqarnerminik inuuniarnermikkut ajornartorsiulersimavoq. Pissutsit tamakku aaqqittariaqartut ataasiarnanga maannamut taakkartorpakka. Qisuariartoqassananilu.
Allakkisartutut anngaaginnartussatullu kommunerujussuup iluani inissisimaneq naammaleqaaq.
Allanngortoqartariaqarpoq.
Aalajangiisinnaassuseq, aqutsineq nalilersorneqarniarli.
Innuttaaqataavugut siumut ingerlalerusuttut, borgmesterimiillu tikinneqarsinnaanerluunniit ajornartutut allaat ullut makku misigaagut. Nuuk qanissusia siornali marts 2022 borgmesterimit tikinneqarpugut. Arsuk eqqaassagaanni qanga qanga tikinneqarpa? Pissutsit ilungersunartut kommunerujussuunitsinnut illoqarfinnut mikinerusunut ipisitsilerput.
Tunumilu nunaqarfik ineriartortoq aalisarnikkut siuarsartoq inuusuttortaasa nammineerlutik inissianik amigaateqarlutik Laura T. Uitsatikitseq suleqatigalugu siunnersuuteqarnikuupput, kommunalbestyrelsimilu amerlanerussuteqartut suleqatigiittullu IA Nalerarlu itigartitsissutigaat.
Allannguisinnaassuseq misilerarneqartariaqarpoq. Periusissiaq aqqutigalugu.
Allakkisartuuneq naammaleqaaq, suliassarlu Nuummiit kisimi kivissinnaanngilaat.