Rubinisiorfik ammarneqarmat Qeqertarsuatsiaat iluaqutissarpassuarnik neriorsorneqarpoq. Maanna paasinarsivoq isumaqatigiissut imaqanngitsoq. Tamanna piaarnerpaamik aaqqinneqartariaqarpoq. Piiaanissamut akuersissummut atatillugu isumaqatigiissutit tutsuiginartumik ingerlanneqassappata, piffinni innuttaasunut iluaqutaanissaat pisariaqarluinnarpoq
All.: Peter Davidsen, Sermersuummi kommunalbestyrelsimut ilaasortaq, Siumut
Naluneqanngitsutut Qeqertarsuatsiaat eqqaani rubinisiornissaq aallartisarneqarmat tusarniaanerni annertuumik sakkugineqarpoq qanoq nunaqarfimmut iluaqutaassanersoq.
Rubinisiorfiup ammarneqarnissaanut atatillugu 2014-mi Impact Benefit Agreement (IBA) isumaqatigiissutigineqarpoq, Qeqertarsuatsiaanut il.il. iluaqutigineqarnissaa qulakkeerniarlugu.
Kommuneqarfik Sermersooq IBA isumaqatigiissummut atsioqataammat qanoq malitseqartitsisimanersoq apeqquteqaatigaara.[1]
Akissuteqaat tunngavigalugu aamma Qeqertarsuatsiaani innuttaasut qisuariarnerat aallaavigalugu paasinarpoq IBA isumaqatigiissut eqqortinneqarsimanngitsoq.
IBA isumaqatigiissut uku akornanni; True North Gems Greenland A/S (TNG) & (Greenland Ruby), Kommuneqarfik Sermersooq (KS) aamma Kalaallit Nunaanni Namminersorlutik Oqartussat (GS) ilaatigut ima ersaritsigisumik allassimasoqarpoq:
“Ukiut tamaasa akuersissummik piginnittoq aalajangersimasumik amerlassusilinnik kulturimut innuttaasunullu aningaasaateqarfimmut aningaasaliissuteqartassaaq, 100.000 DKK aallarniutaallutik 250.000 DKR qaffakkiartortinneqartunik. Aningaasaateqarfiliornermut siunertaasoq tassa nunaqartut kulturikkut timersornikkullu tunngasutigut ingerlatsinerannik tapersersuisarnissaq, Qeqertarsuatsiaani nunaqartunut iluaqutaasussamik. Tassungalu atatillugu aningaasaateqarfimmut siulersuisunik pilersitsisoqassaaq.”
Tamanna piaarnerpaamik IBA isumaqatigiissummut atsiorsimasut akornanni aaqqiivigineqartariaqarpoq, tassami pissusissamisoorsinnaanngilaq 2014-mi atsioqatigiittoqarmalli ulloq manna tikillugu Qeqertarsuatsiaani innuttaasut kulturimut innuttaasunullu aningaasaateqarfimmut aningaasaliisunik takusaqarsimanngillat.
Tamanna pissusissamisuunngilaq aamma Covid-19 utoqqatsissutigineqarsinnaanngilaq, kiisalu IBA isumaqatigiissummi allaqqanngilaq aatsaat akuersissummik piginnittoq ingerlatsinermi sinneqartoorpat tamanna pissasoq.
Nunatsinni aatsitassarsiornermi tusarniaanermi neriorsuutit aamma piiaanissamut akuersissummut atatillugu IBA isumaqatigiissutit tutsuiginartumik ingerlanneqassappata piffinni innuttaasunut iluaqutaanissaata qulakkeerneqarnissaa pisariaqarluinnarpoq, aatsitassaq ataasiaannarluni piiarneqartussaammat piffimmut inuiaqatigiinnullu iluanaarutaanissaa tamatta soqutigisaraarput, tamatumalu piviusunngornissaanut qullersaasut akisussaasullu malitseqartitsinissaq akisussaaffitsik kinguneqartittariaqarpaat!
Qeqertarsuatsiaani utoqqartaasut ilaanniit ilisimaarivara nunaqarfik qanoq oqaluttuassartaqartigisoq, upperisarsiornikkut aamma kulturikkut annertuumik tunniussassaqartoq.
Taamaattumik Kommunalbestyrelsimi ilaasortatut piumasarissavara piaartumik kulturimut innuttaasunullu aningaasaateqarfimmut aningaasaliisoqassasoq. Qeqertarsuatsiaani utoqqartaasut ilisimasaat oqaluttuassaallu kingusinaartigata qulakkeerniarlugit atuakkiornermut kulturikkullu nunaqarfimmi pikialaartitsinissamut atorneqarniassammata.
[1] https://sermersooq.gl/kl/question-answer/iba-isumaqatigiissut-rubin-pillugu-qeqertarsuatsiaanut-tunngasoq/