Inatsisartut upernaakkut ataatsimiinneranni Tasiilami erngup nukinga atorlugu nukissiorfik eqqartorneqarpoq. Nukissiuuteqarnerup ineriartortinneqarnissaa allanut ineriartuutissanut matuersaataavoq. Maluginiarparali Naalakkersuisut nangaassut allaffissornerullu allilerneqarnissaanik siunniussisartut
All.: Lars Poulsen, Inatsisartunut ilaasortaq, Siumut
Tasiilami erngup nukinganik innaallagissiorfik allilerniarlugu nukissiuummik nutaamik innaallagissallu aqqutaanik pilersitseqqullugit naalakkersuisut peqquneqarnissaannik upernaaq manna Inatsisartunut siunnersuuteqarninnut toqqammavigaakka, taanna pinngikkuni qanoq sumiiffiup toqqissisimanartumik ineriartoqqinnissaa takujuminaatsikkakku. Qujanartumillu Siumut sinnerlugu qinikkat suliassamik paasinnillutik tapersersuisimapput.
Naallu piviusunngortitsisoqarnissaanik suli neriukkaluartunga, maluginiartarpara misissueqqittoqaannarnissaanik Naalakkersuisut kissaateqarnerorpaluttartut. Tamannalu ilumuussappat assut ajuusaarnartutut isigissavaa. Tassami Nunatta Kangiani pissutsit ilungersunartutut oqaluuseriitigalugit, pisussaqalersorlu uteriartitsiniartarneq akueriuminaatsikkakku.
Tamanna pissuteqarpoq sumiiffimmi inunnut periarfissaqartitsinerusoqassappat inuussutissarsiornikkullu ineriartortitsisoqassappat, nukissiuuteqarnikkut patajaatsumik inissisimasoqarnissaa pisariaqarluinnarmat.
Tamanna sanaartortoqassappat, allatigut ineriartortitsisoqassappat, mittarfiliortoqassappat, inissialiortitertoqassappat tunisassiorfiliortoqassappallu pisariaqarluinnarpoq. Pineqartoq sumiiffimmi ineriartornissamut matuersaataavoq.
Taamaattumik oqaluinnarneq misissorneqareersimasullu naamareeqisut qaavatigut misissuisitseqqittarneq uniffigiunnaarlugu, suliassaq aningaasaliiffigisariaqartoq isumaqarluinnarpunga.
Ineriartorneq oqaasiinaannani pisortanittaaq tapersersorneqarluni aallartilli. Akueriuminaatsippara suliassat kinguarsarniartutullusooq illugit, nalunaarusioqqinnissat kisiat siunniunneqartassappata, taamalu allaffissorneq annertusarneqaannartarluni. Tamanna siunertarisinnaanngikkipput isumaqarpunga.