Avannaata Qimussersua Kommune Qeqertalimmi siunissami ingerlanneqartarnissaa periarfissaajuaannartariaqarpoq. Avannaata Qimussersuanut tapiissutaasartut allanngortinneqannginnissaat Siumut gruppianiit kissaatigaarput
All.: Aqqa Samuelsen, Kommune Qeqertalimmi kommunalbestyrelsimi Siumut gruppiani siulittaasoq
Avannaata Qimussersua Kommune Qeqertalimmi siunissami ingerlanneqartarnissaa periarfissaajuaannarnissaa Siumumit tapersersorparput.
Qimussertarnerup siunissami kinguneqarnerusumik ataavartinnissaanut tapiissutit atorneqarsinnaanerinut oqaloqataarusuppugut, assersuutigalugu meeqqat qimussernermik annerusumik aallutaqalernissaat siunertaralugu.
Piffissami matumani Kommune Qeqertalimmi tapiisarnermut ileqqoreqqusap tusarniutigineqarnerata nalaani siunissami peqatigiiffinnut, sunngiffimmi suliniutinut, pinaveersaartitsinernut, timersornikkut kulturikkullu aaqqissuussanut pitsaasumik sinaakkusiinissarput pingaartillugu oqallilluartariaqarpugut.
Kommune Qeqertalimmi kommunalbestyrelsimi partiit Inuit Ataqatigiit aammalu Atassut Avannaata Qimussersuanut kommunimiit tapiissutit ikilisarniarlugit oqallipput. Avannaata Qimussersuanut kommunimiit tapiissutit ikililerneratigut Kommune Qeqertalimmi Avannaata qimussersua siunissami ingerlanneqartarnissaanut soqutigineerunnissaa allaalluunniit ingerlakkumaneerunnissaa ernumanartoqartipparput.
Tapiisarnermut ileqqoreqqusap tusarniutigineqarnerani Siumumit ilaatigut Avannaata Qimussersuanut tapiissutaasartut ikilisarneqannginnissaat pingaartipparput.
Avannaata Qimussersua aaqqissuussaq Nuna tamakkerlugu soqutigineqarlunilu malinnaaffigineqartartoq Kommune Qeqertalimmi siunissami periarfissaajuaannartariaqarpoq. Avannaata Qimussersua siunissami kommunitsinni aaqqissuunneqartuassappat tapersersuinissaq pinngitsoorneqarsinnaanngilaq.
Kommune Qeqertalimmi tapiisarnermut ileqqoreqqusap tusarniutigineqarnerani aammalu kommunalbestyrelsimit akuerineqartinnagu Avannaata Qimussersuanut tapiissutaasartut allanngortinneqannginnissaat Siumut gruppianiit kissaatigaarput. Aamma Avannaata Qimussersuanut susassaqartut avaqqullugit tapiissutaasartunik ikililerisoqassappat akuerinavianngilarput.