Kalaallit Nunaanni takornariaqarnermik eqqartuisoqartillugu Ilulissat avaqqukkuminaatsorujussuuvoq. Takornariaqarneq Ilulissani 1970-ikkunnili inerisarusaarneqartuarsimavoq, nappaalanersuarlu sioqqullugu nunatsinni, avataaniit takornarissanik ornigarneqarnerpaalluni, taamaammat takornariaqarnermi illoqarfittut pingaarnerpaami arfinilinnik hoteleqarpoq. Mittarfiillu piareerpata nunatta avataaniit pilerisuttorpassuaqarpoq, nunatsinnilu piareersimanerusariaqarpugut. Takornariaqarnermut inatsit suliarineqartariaqarluinnarpoq!
All.: Paarnannguaq Mathiassen, Siumup Inuusuttunut Suleqatigiiffia
Ukioq aallartilaartoq Visit Greenlandip pisortaa Hjörtur Smárason standby.dk-mi issuarneqarpoq, nappaalanersuaq qaangiussimalerpat, ungasinnerusorlu eqqarsaatigalugu Kalaallit Nunaani takornariaqarnerup annertusinissaa, sualuppoq mittarfiit Ilulissani Nuummilu piareeriarpata. Tamanna siulittuineq kisiartaalluni piginngilaa, tassami nunarsuatsinni angallannermut suliaqartuniit aamma nunarput arajutsisimaneqanngilaq. CNN Travel allattukkamik tapiisartuminut, nappaalanersuullu qaangiussimalernerani takornariaqarneq ingerlalluaqqileriarpat, angalaffissanik nunarsuarmi pitsaanerpaanik 25-nik toqqartuisissimavai.
Qeqertarsuup tunua issittup Grand Canyon-iatut, allattugaatimi nutaajusumi sanillersuuneqarluni, takornariaqarnerup ammaqqinneqarnerani nunarsuatsinni pissanganartutut angalaffigineqarsinnaasut 25-t akornaniitinneqarluni. Kuussuit, inuilaarsuarmi pisunnerit, isikkiviit alutornavittorsuit, iluliarsuit, arferit, Ilulissani illut qalipaatigissut allarpassuillu. Tamakkua tunngavilersuutaapput qeqertarsuup tunuata takornarissatut ornissallugu pilerinarnerpaatut nunarsuarmi 25-usuni allaaserineqarnerani.
Ilulissat Qeqertarsuup tunuani takornariaqarnermi qitiusumik aallaaviulluni, mittarfiit aallarteriarpata annertoorujussuarmik aatsaat iluamik tikerarneqalissaaq. Ilulissaniippoq, Ilulissat Kangerluat UNESCO-p nunarsuatsinni kingornussassatut eriagisassaanut allattorsimaffimmi ilaasoq, tassungalu atatillugu Kangiata Illorsua, imminerminik takornarissanik ornigarneqalereersoq, sermip sikullu Qeqertarsuup tunuani pingaaruteqarneranik oqaluttuartoq. Ilulissat akiani Qeqertarsuaq assissaqanngitsumik avatangiisilik, seqernup kaaviinnarfia, kaperlattarnera, arsarnerit, qimusserneq il.il. Aasamut Ilimanami neriniartarfimmi Savalimmiormiut neriniartarfiat marlunnik Michelinimik ullorialik aallartissaaq, tamanna namminerminik takussutaaginnarpoq qanoq periarfissaqartiginersoq.
Takornarialersunik avataaniit tutineqassanngikkutta, nunaqavissunik salliutitsinissaq pisariaqarluinnarpoq. Nunaqavissut annertunerusumik pingaartinneqarlutik periarfissaasa annertusarnissaat pisariaqarpoq.
Takornarissanik sullissisut nunatsinni najugaqarnissamik allattorsimaffimmiinnissamik piumasaqaasersornissaq, nunaqavissunillu suleqateqarnissaannik piumasaqaasersornissaq pisariaqarluinnarpoq. Minnerunngitsumillu nunaqavissunik piginneqataasoqartarnissaanik piumasaqaasersornissaq pisariaqarluinnarluni. Taamaasilluni aningaasanik nutaanik nunatsinnut isaatitsinissap annertunerpaaffianiisinneqarnissaa, nunaqavissullu ullumikkorninngaanniit annerusumik kivitseqataassallutik.
Taamaammat takornariaqarnermut inatsit Inatsisartunit suliarineqartariaqarpoq.