Kommuneqarfik Nuuk nunatsinni illoqarfinni pingaarnersaq. Suut tamaasa akigalugit innuttaasuni kommuneqatigisanilu inuerunniarlugit anguniagaqarpoq, aningaasanik 20 millionilinnik allaat malittarisassat avaqqullugit ingerlatsilluni
All.: Dorthe-Marie Mogensen-Fontain, Kommunalbestyrelsimi ilaasortaq, Siumut
Innuttaasut paasissutissiissutit imminermut kisimik pitsaasut saqqummiukkaluaannartarlugit.
Atorfilittat pisuutiinnarlugit sulianik. Akisussaaffimmik miloriussineq, akisussaaffimmik tigusiumannginneq kukkussutit ilinniutigiinnarlugit aammalu inoqatiminut upperinnittuunermut tunngavigalugu kukkunerusoq. Akisussaanerpaaq tassaavoq borgmesteri! Aningaasaqarnermut naalakkersuisuusimasoq akigiinnarlugu.
Napparsimaveqarfiit kigutileriffiit angummassinnaanngillat maannamut. Inuttaasut saaffiginninnermikkut utaqqingaatsiaqqaarlutik sullinneqarsinnaapput.
Inissiat tuaviinnaq naammassiniapallatat nunaqavissunut miloriussuuneqartut, pitsaanerit suliartortitanut agguaanneqarlutik.
Atorfiit illoqarfinni mikinerniittut nuummut nussorlugit, illoqarfeeqqat nungusarlugit inuerussarlugit, aqutsineq avataaniit ingerlatilerlugu. Nammineq ingerlatsisinnaanerat ipitillugit. Inuerussaaneq annertooq.
Kommuneqarfigisaq illoqarfimmi ataasiinnarmi ataatsimiittarneq ingerlattuarlugu. Tamat oqartussaaqataanerat mattullugu, tikittaraallu illoqarfinnut mikinernut ullualunnguit maluginagulu nuna tikitartik aallaqqiinnallaaraat. Ataatsimiisitalianilu angalanerit unitsittarlugit soorlu suliffeqarnermut isumaginninnermut ataatsimiisitaq Novemberip naanera tikittussaq unippoq, uggornaannartumik taamaattummi tikinneqartarneq pisariaqarluinnarpoq.
Tassa Nuuk ukioq 2030-imut anguniagaa suna tamaat akigalugu.
Illoqarfinnimi allani inuttussutsini suut anguniarneqarpat? Tassaqaluunniit eqqaaneqapajuttarpat? Inuttaasut qassit anguneqarpata kaffillissappat? Immaqaluunniit inuttaasut ikiligaangata kaffillertalissappat?
Paamiut immikkut aallutariniarpaat ukiuni kingullerni Tasiilaq initusimammat, pilersaarutit taava naak? Sanaartugassat qangali pilersaarutaareersut sassaalliutigineqarput. Taamaattorli noqqaavugut suut immikkut aallunniarneraat anguniarneraallu pilersaarummik takujumalluta, sulili naammassineqanngilaq. Oqaasiinnaasaraat maannamut tamannalu ilisimaarilluinnarparput periuseq.
Arctic Parkimik pilersitsiniarnerit illoqarfeqatigisat inissaaleqillutik nilliasut! Nutaanik inissianik pitsaasunik takusaqarsimanngitsut ukiorpassuarni. Naalakkersuisullu pisuutiinnarlugit kivisinnaanngimmassuk suliassaq blokit piiarneqaraangata illuliornerit tallimat nappartarniarlugit. Kiammi sukataarutissai? Borgmesterip.
Sissaq sinerlugu pisuffissanik pinnersaasersorlutik tamannak millioninik nalilinnik, illoqarfeqataaniaraluit sumik sumik eqqaaneqassappat? Ineqarniarnikkut ajornartorsiuteqannginnerarlugit taagorlugit, pissutsit piviusut naluneramikkik?
Aaqqissuussanikkut ingerlanerat amigarluinnartoq, 2. viceborgmesteri kommunalbestyrelsi ivertinneqarmalli najuuttoq. Kingorna takuneqaqqinngilaq. Ataatsimiisitaliamiluunniit naak? Soorunami taarserpaat.
Tassa Nuuk ukioq 2030-imut suut tamaasa akigalugit 30.000-inik innuttaqalerniartoq.
Nuuk ernumanngilluinnarpoq ineriartornissamut, ineriartortuassaarlu qaqugumorsuaq suliffissaqartuarmat ilinniarluarsimasunullu suliffissaqarluarmat. Inatsisilli unioqqutiinnarlugit inissianik attartortoqaannarsinnaanngilaq kingornalu aningaasassaaleqilernissaq qulakkeerlugu.
Nuuk ineriartortuassasoq apeqqusinngilluinnarparput, innuttaasullu 30.000 angussavaat tamanna aamma qularutissaanngilaq, qanorli kommunimit anguniarneqarnersoq uani isornartorujussuuvoq. Kommuneqarfik Nuujunngilaq Kommuneqarfik Sermersooq tassaavoq Ittoqqortoormiit, Tasiilaq, Kulusuk, Kuummiut, Tiniteqilaaq, Sermiligaaq, Isortoq, Arsuk, Paamiut Nuullu. Tassaapput taakku ataatsimoorullugit kommunitut anguniagaqarfigisassat!
Kommuneqataalluta nilliaqqaartariaqarneq qatsulluinnarparput, tamat oqartussaaneranit ipisitsiuartoq.