Mala Høy Kúko, Inatsisartunut ilaasortaq
Inatsisartut suleriaasianni § 37 imm. 1 naapertorlugu Naalakkersuisunut apeqqut imaattoq matumuuna saqqummiuppara:
Naalakkersuisunut apeqqut:
- Kalaallit nunatsinni innuttaasut nakorsiarnerminni ukiuni kingullerni tallimani qanoq annertutigisumik peqqinnissaqarfik nipaallisaatinik nakorsiartunut tunniussinikuua?
- Peqqinnissaqarfimmi ukiuni tallimani nipaallisaatit tunniunneqartut aningaasanngorlugit qanoq naleqarpat?
- Nipaallisaatit ukiuni tallimani kingullerni kalaallit nunatta peqqinnissaqarfiata qanoq annertutigisut piniarnikuuvai?
- Ukiuni tallimani kingullerni nipaallisaatit piniarneqarnikuusut qanoq naleqarpat?
Tunngavilersuut:
Kalaallit nunatsinni sumi tamani innuttaasut nakorsiarnerminni anniaatigisaminnik paasineqarnatik nipaallisaatinik tunineqartuartarnertik ukiuni arlalinni misigisaqarfigiuarsimallugit oqaatigisarpaat.
Ajoraluartumilli innuttaasut ilaasa anniaatigisaminnik nakorsiartuaraluarlutik, uteriittuaraluarlutik paasineqaratik kisiannili nipaallisaatinik tunineqaannartarnertik pissutigalugu kingusinaartumik paasitinneqartarput nappaammik kræftimik napparsimalersimanerminnik. Taamaammat paaserusunnarsivoq nunatsinni qanoq annertutigisunik nipaallisaatinik nakorsiartunut tunioraasoqartarnersoq peqqinnissaqarfimminngaaniit.
Ullut qulit iluanni akissutisinissara pissasoq naatsorsuutigaara.