Erik Jensenip SIK-p ataatsimeersuarnerani naatsumik oqalugiaataa. SIK Ilulissani ataatsimeersuarpoq sitsip aallaqqaataaniit pingajuat ilanngullugu.
Asasakka ataqqinartut sulisartut, siulittaasoq, siulersuisut, ataqqinaammik ilaasortat najuuttusilu tamassi.
Tulluusimaarutigaara Siumut sinnerlugu maana ataatsimeersuarnissinni najuutilaarsinnaagama.
Pingaartissimavara maanga ilassiartussallusi, takutikkumallugu uagut partiitsinnit sulisartoqarneq pingaartikkipput aammalu aaqqitassaasinnaasut pillugit qanimut suleqatiginnikkusuttugut. Suliassammi amerlaqisut oqaloqatigiissutigalugit ingerlakkutsigit, pitsaasumik angusaqarsinnaanissarput qularutiginngilara.
Qangaaniilli SIK qanimut suleqatigisarsimavarput. Tamannalu nangittumik ingerlateqqikkumavarput.
Oqaloqatigiissutissaqaqaagummi, soorlu assersuutigalugu ”Suliffeerunnermi ikiorsiissutit pillugit Inatsisartut inatsisaat nr. 2, 15. maj 2014-imeersumi” ikiorsiisarneq allaffissornerujussuarmik naatsorsuinerujussuarnik malitseqarnera suleqatigiilluta allanngortinnissaa isumagisigu, taamaasilluni satsimik aaliangersimasumik aaqqiinikkut pitsanngorsaarujussuartoqarsinnaammat.
Nunarput tummisarput, uumaatsunik uumassusilinnillu pisuussutinik ulikkaarpoq. Taakkulu atorluarnissaat naaggaartorniarutsigit taava siuariartorneq naaggaartorsimassavarput, allaniillu isumalluuteqarneq annertusarniarsimallutigu. Naatsorsuutiginngilaralu tamanna sulisartukkormiut anersaarigaat. Nunarpummi siuariartortariaqarpoq inuilu nammineerusussuseqarput.
Suliffiit pilersinnerisugut aningaasarsiornerullu siuariartortinneqarneratigut aatsaat atugarissaarnerunissarput sulisartukkullu atugaasa suli pitsanngorsarnerunissaat pilersissinnaavarput.
Immitsinnut tamatta pisariaqartippugut, aatsaallu oqaloqatigiinnikkut pisariaqartitavut pillugit paaseqatigiinneq pisinnaavoq.
Anguniakkavut tunngaviusumik assigiiffinnik ulikkaarput.
Suleqatigiinneq oqaloqatigiinnerlu aaqqissuusamik ingerlateqqilerniartigu.
Naggataatigut ataqqinartut SIK-miut, tamassi ukiuni 65-inngortorsiorlusi nalliuttorsiornissinni uummammik pisumik pilluaritsi. Kammalaat ataqqinartoq siulittaasoq Jess G. Berthelsen, suliarpassuarnut suleqatitit tunuliaqutitit suleqatigalugit angusarpassuassinnut pilluaritsi.
Angusaqarluarnissassinnik qamannga pisumik kissaappassi.
Ataatsimeersuarluarisilu.
Qujanaq