Piniartut atugaat pillugit pitsanngorsaasoqaqqullugit Naalakkersuisut saaffigisaraluarlugit tusaasaqarumanngillat. Maanna Kommuneqarfik Sermersuummi borgmesteri nikuittariaqalerpoq
Ukiuni kingullerni Tasiilami Ittoqqortoormiunilu piniartortagut inuuniarnikkut piniakkamikkut ilungersunangaartunik atugassaqartinneqaqattaarput. Tamarmik Naalakkersuisut aalajangersagaannik tunngaveqartut. Qilalugartassanimmi aaqqiisoqarniartoqanngilaq.
Politikerit inatsisartuni ilaasortat, kommunimi ilaasortat piniartullu peqatigiiffiat arlaleriarlutik assigiinngitsutigut piniartunut illersuillutik qisuariaqattaarnikuupput. Qisuariaatigisaallu annertunerusumik tusarneqaratik paasineqaratillu angusaqarfiunikuunngillat.
Naalakkersuisut inunnik ilungersortunik tusaasaqarumanngillat, aamma ilungersunartussat siunersisavut takujumanngilaat, Inatsisartunut ilaasortaq, Mala Høy Kúko isumaqarpoq.
– Isumaqarluinnarpunga Kommuneqarfik Sermersooq maanna iliuuseqaqataalluni aallartittariaqartoq. Borgmesteri Charlotte Ludvigsen innuttaasut sinnerlugit nikuittariaqalerpoq. Piniartut oqaatigiuagaat qilalugartassanik tunineqarnissamik oqariartornerat illersorlugu iliuuseqartariaqalerpoq, Inatsisartunut ilaasortaq, Mala Høy Kúko oqarpoq.
Tasiilami Siumup immikkoortortaqarfiani siulersuisunut ilaasortaq, Eli Kuitse, ilanngulluni aaqqiiniartoqarnissaanik piumasaqarpoq.
– Borgmesteritut atuuffik innuttaasunik illersuisutut inissisimaneruvoq. Borgmesteri maanna iliuuseqarniaqataasunut ilanngulluni saqqummertariaqalerpoq. Isumaqartoqarpaluttartoq tusartarpara, tassagooq paasissutissanik naammattunik peqartoqanngitsoq. Isumaqarpunga peqqusisoqartariaqartoq, paasissutissanik pingaarutilinnik katersisoqaqqullugu kommunimi inuutissarsiornermut ataatsimiititaliaq maanga ornigutissasoq, siulersuisunut ilaasortaq, Eli Kuitse oqarpoq.