Canadami nunap inoqqaavisa meerartaasa toqungasut timaat 215-it, meeqqat atuarfigisimasaasa nalaani nunamut ataatsimoortillugit matoorutiinnarneqarnikut nassaarineqarput, meerannguit ilaatigut pingasuinnarnik ukiullit toqusimasunut akuullutik. Meeqqat taama pineqarsimasut suli amerlanerujussuit nassaareqqinneqarnikuunatik tammaannarnikut aamma assinganik pineqarsimasinnaanerat ilimagineqarpoq.
Meerannguit toqutaasimasut ilaqutaanut uummammit pisumik misiginneqatiginninnerput apuukkumavarput.
Oqaluttuarisaaneq alianartoq nunasiaatillit inoqamminnut ilaatigut inuttulluunniit isiginngisaminnut ajornerpaamik ataqqinannginnerpaamillu kanngunartuliorfiginnissimanerat pillugu akuersaanngilluinnarnerput maanna apuukkusupparput. Tamanna Naalakkersuinikkut tapersersorneqartumik ingerlatsiviunikuummat, Siumumiit taamaaliorsimanerit akuersaarneqarsinnaanngilluinnarmata oqaatigissavarput.
Meerartatta 1950-ikkut aallartisimalerneraniit ukiorpassuit angajoqqaavinit, nunaqarfianniit, inuunermit sungiusimasaanniit kammalaataanniillu peerlugit aallartitat aqqusaarnikuuaat, eqqaallugit killitsinnanngittuunngilaq.
Nunasiaatilinniit nunat inoqqaavi inuit ineriartorsimanerminni kinguarsimasutut taakkartorlugit nutaaliamik inuuneqalernissaat utoqqatsissutigalugu, ilinniartitaaneq sakkugalugu inuiaat avissaartuutsinneqarsimanitsinniit ulloq manna tikillugu kinguneri suli atorneqarput, naalliuutigineqarlutillu.
Siumumiit isumaqarpugut pisoq taama alianartigisoq qaangiataaginnarneqarsinnaanngittoq, taamaattumillu misiginneqatiginninnerput ersersillugu Naalakkersuisutigoortumik nuna tamakkerlugu ullormi aalajangersimasumi misiginneqataanitsinnik takutitsisoqaqqullugu iliuuseqartoqarnissaa innersuussutigaarput
Misiginneqatiginnilluta inuulluaqqusivugut
Erik Jensen
Siulittaasoq, SIUMUT