Nappaammik ajorluinnartumik eqqugaasimagaanni, saniatigut atugarliorneq akiorniartariaqassanngilaq.
Naalagaaffeqatigiinnerup ataatsimiissutigineqarnerani kiisalu isumaqatiginninniarmi pinngitsoorani qaqinneqartariaqarluinnartoq ataaseq nappaammik eqqugaasut nunatsinni katsorsarneqarsinnaanngitsut atugaat ineqarnerat nerisaqarnerallu pitsanngorsaavineqarnissaat.
Ukiorpassuit eqqartorneqarpoq politikkerit arlallit aamma nappaammik eqqugaasimasut qaqittuagaat iluarsiivigineqarsinnaanngisaannartoq, piaartumik naalagaaffeqatigiinnerup nutaamik nalilersorneqarnerani qaqinneqartaraiaqarluinnarpoq.
Sapaatiummat napparsimasut qallunaat nunaanni katsorsarneqartariaqartut pulaarpagut, oqariartuutaat imaannaanngillat aamma taamaammat politikkerit illuatungeriit toqqaannaq ilisimatippagut, taamaakkaluartoq qanoq suleriartoqassanersoq qanorlu aaqqiisoqassanersoq nappaammik eqqugaasut utaqqisinnaanngilaat.
Katsorsarneqartut napparsimasut angerlarsimaffigisaanni najugaqartinneqartut, atukkatik pillugit anngussaat makkuupput.
Issuaaneq aallartipoq ” Uanga maanga nappaatiga pillugu utikaajaarpunga, siornatigut tumarnguersaatinik manna peqartarpoq nillataartisiveqarpoq, tamatigut napparsimasut peqqiilliornertik pillugu neriffissat eqqorlugit nerisinnaaneq ajoramik, tamakku tamaasa peerniukuuaat sipaarniaraminngooq”.
Tullia ” Kemo sakkortooq atorpara katsorsartinninni, ilaatigut taqqakkut uummatinnut atasumik atortulerneqarpunga, talinniik uummatinnut atasumik, taannalu pillugu anertikkaqqusaaanngilanga assorooqqusaanngilanga, majuartarfitsigut majuaqqusaanngilanga, oqorutikkalu nammineq qalilersoqqusaanngilakka nakorsap innersuussat. Soorlu taakku soqutigineqanngitsut najugaqarfimmi ikiortissaq ajornaqaaq pissarsiassaanngilaq, arlaleriarlugu misigiitsoorlunga uummatiga kalluarpara taamaattussaananga”
Nerisaqarnertik isumaqatigiillutik ima oqaasertalerpaat: ” Nerisaqarnerput pitsaanngilaq, igaffiimi sulisut tamarmik qallunaajupput, aalisagartorsimagutta nungunngippat aqaguani allanngulaarlugu sassaalliutigisarpaat sulilu sinneqarpat ullut pingajussaa aalisagaq taanna sassaalliutigineqartarpoq. Kukkukuut qallunaamerngillu nerisaritinneqarput ilaatigut sungiusimanngisagut. Puisip neqaanik igganneqarneq ajorpugut, nerisarloqaagut”.
Aappaa nangippoq ” Angajuma puisip neqai nassatanngui kittaarlugit nerisarivakka, qiaatigalunga nerisarpakka, aqaguani misigisimasarpunga timera nukissaqarnerusoq, nangillunilu kemo-tinninni neriuminarsinnaasunik sussaqanngilanga ilaatigut ullorpassuit tomat suppe iijuminarnersiorlugu inuussutissartaqarpiangitsoq (tiitorfimmut uunnariaannaq) nukissaqarniarlugna pisarpara (qiaatigaluni oqaatsini ima naggaserpai) naggataagut timinnit igitassartai (quua anaalu) nerisattut qalipaatinillutik aniasarput. Sivisuumik maaniikkallartussaalluni atukkagut pitsaanngilluinnarput”.
Nangillutillu ” Ilaat tikittarput ingammik isorliunerusuneersut akiliutaannaqarlutik taamaattumik aningaasaatiminnik atuisinnaanatik, tigusinissaminnut periarfissaqaratik, tamanna aamma isiginnaartuulluni ilungersunartarpoq, namminerlu katsorsartilluni annerusumik ikiuussinnaanani”
Taamaattumik neriorsorpakka pisortanut oqartussanut anngunniarlugit atukkat taamaattut aali ilaminiinnanngui, taakkualu pinngitsoorani Naalagaaffeqatigiinnerup oqaluusereqqinnerani iluarsisassat utaqqisinnaangitsut ilamininnguariinnarpaat. Soorlu nerisaqarnerup aaqqiivigineqarnissaat nunatsinneersunik kalaaliminernik annerusumik pissaqartinneqarnissaat, kiisalu kalaaliminernik ilisimasalinnik nerisassiortoqarnissaat, minnerunngitsumillu nerisaqarnerup tungaatigut sipaarniarfigineqannginnissaat.
Nunarput qimallugu katsorsarneqartut oqaluttuaasa tusarneqarnissaat neriorsuutigigakku, neriullungalu piaartumik iliuuseqarfigineqassasut maanna innuttaaqatinnut nipaat oqariartuutaat tusarliuppara.
Pisortat oqartussat peqqissartut nipaat tusaasigit iliuuseqarfigisigit, imaasiinnaammammi killissannguartik atoraat nunami perorfiginngisaminni, nerisassat sungiusimanngisatik, ilaminnut maqaasinerminnut qalliullugit artorsaatigigaat.
Politikkerit sulisussaapput atukkanik pitsanngorsaassallutik, aporfinnillu annikinnerpaaffissaannut suliaqassallutik, taamaattumik naalagaafeqatigiinnerup aqqani immikkut isiginiarneqarlik “piumassuserinngisamik” nunarput qimallugu katsorsartariaqartut minnerpaamik nerisaqarnikkut angerlarsimaffeqarnikkut ikiorneqarnissallu pitsaasumik atugaqarnissaat.
Kalaaliminermik killilersuineq katsorsarneqartut najugaqarfiini immikkorluinnaq aaqqiivigineqarli, kiisalu oqaaseqatigisaannik sulisoqarnissaat sullinneqarnissaallu qulakkeerneqarli.