Lars Poulsen Siumut ullumi inatsisartut suleriaasiat naapertorlugu §37 imm. 1 apeqquteqarpoq ukiuni tulliuttuni nunatta kangiani qilalukkanik qernertanik pisassiinissamik Naalakkersuisut pilersaaruteqarnersut. Taamalu aperinerminut ima oqaaseqarpoq:
”Ilisimatuussutsikkut misissuinernit paasisat aallaavigalugit ukiuni tulliuttuni qilalukkarnik qernertanik nunatta kangiani pisassiisoqannginnissaa innersuussutigineqarpoq. Siumumiit isumaqarpugut pisassaarutitsisoqassanngittoq, pisassaqartitsiuarnissarli pingaaruteqartoq. Taamaattumik naalakkersuisut sakkortuumik kajumissaarpagut nunatta kangianut qilalukkanik qernertanik pisassiilluaqqullugit.”
Lars Poulsenip apeqquteqarnerminut tunngavilersuutaasa ilagaat pisassiisoqanngittuussappat nunatta kangiani inuusaatsimut aammalu kultorikkut ileqqutoqqanut kalluaangaatsiarsinnaanera ernumagalugu. Tamannalu ima itisileqqippaa:
”Qangarsuaaniilli qilalukkap qernertap inuunitsinnut pingaaruteqarluinnarpoq. Taamaattumik nunatta kangiani sineriaqqortoqisumi qilalukkanik qernertanik pisassiinngittoornissaq takorloorneqarsinnaanngilaq. Pisassiinngittoornissaq nunap inoqqaavisut pisinnaatitaaffinnik unioqqititsinerussaa, ileqqutoqqatsinnillu tammariartuaartitsinermut aallaqqaataassalluni. Taamaattumik Naalakkersuisut pingaartillugu pisassiinissamik ilimasaarisariaqartut isumaqarpunga.”
Taama naggasiivoq siumut sinnerlugu Inatsisartunut ilaasortaq Lars Poulsen.