Naalagaaffinngoriartornitsinni nunatta nammineerluni ingerlavissaa
nammineq nunatut ilusilersugassaraarput, tamanna inuiaat Kalaallit
namminneerlutik pissaaneqarfigigaat naqissuserusupparput, nunallu tamalaat
akornanni nunat allat sutigut suleqatiserinnikkumanerat tusassallugu
piareersimavugut. Nunattalu nammineq inimi matoqqasumi allanit
tasiorneqarani nunanik allanik ataatsimeeqatiginninnissani maanna
piareersimaffigaa.
All.: Erik Jensen, Siulittaasoq Siumut
Maannami nunarsuarmi pissaaneqarnerpaap nunatsinnut soqutiginnilluni
oqariartuutaa nunatut Naalagaaffinngoriartortutut soqutigineqarnitta iluani
pitsassuartut nersornaatitut tigullugu isiginngitsuusaaginnarsinnaanngilarput.
USA-p Presidenteriligassaata Donald Trumpip juullimi inuulluaqqussutimini
nunatsinnut ilanngullugu inuulluaqqusinera siullermik qujassutigerusupparput,
Siumumiillu iluatsillugu Juullikkunni ilaqutai ilanngullugit pilluaqqorusuppagut
ukiumullu nutaamut iserluarnissaannik kissaallugit.
Nunarsuarmioqataaneq Siumup politikkiani
Siumup politikkeraa niuernikkut, sulisoqarnikkut, ilinniartitaanikkut,
piorsarsimassutsikkut minnerunngitsumillu aningaasaqarnikkut
paarlaasseqatigiiffiusumik eqaatsumik suleqatissarsiorsinnaanerup
ataatsimoorfissarsiorsinnaanerullu ingerlanneqarnissaata tunngavigiuarnissaa.
Taamaasiornikkut nunatta imminut napatilernissaanut siunertalimmik
ineriartuutissanik suleqateqarnerup tunngavissinneqassammat.
Tamanna tunngavigalugu USA-p presidenterligassaata Donald Trumpip nunatsinnut
soqutiginnilluni maannamut arlaleriarluni oqariartuuteqalersimanera aallaavigalugu
ingeqatigiilluta ataatsimeeqatigiinnissamut assammik isaassivugut.
Oqaatigerusupparpullu Trump Kalaallit Nunaannut tikilluaqqusaammat uagullu
aamma ornigunnissamut Siumumit piareersimagatta.
Nunatta nunarsuarmi inissisimarnga Issittumilu pingaaruteqassusaa
Nunatta inissisimarnga issittumi pingaarutilerujussuuvoq. Nunammi pissaanilissuit
akunneranni nunarput inissisimavoq. Taamaattorli illersornissaq pillugu
isumaqatigiissut 1951-imeersoq pillugu nunatta atorneqarsinnaanera, nunatta inuinut
malunnaatilimmik pitsaanerusumik sunniuteqalernissaa, kiisalu 2004-mi Igalikumi
isumaqatigiissut tunngavigalugu nunatta atorneqarnera pillugu aatsaat taamak
oqaloqatigiinnissaq pisariaqartigilerpoq.
Pituffik, Kangerlussuaq aammalu Narsarsuaq pillugit qanoq Trump
takorluugaqarnersoq ilanngullugit Siumumiit paaserusutassatta
ilagilluinnarpaat. Ilaatigullu aamma akisussaaffiit tigoreersimalikatta qanoq
inerisarneqarsinnaanerannut tapertaaqataasinnaaneq tusassallugu
soqutigisarilluinnarparput.
Nunatta pisuussutai atorluarlugit immitsinnut napatilernissarput
pilersissavarput
Attaveqaatigut ineriartortitsinerup malitsigisaanik nunarput pisuussutiminik USAmik
niueqatiginninnissaminik takornariaqarnikkuinnaanngitsoq annertusaanissamik
pilersitisariaqarpoq. Nunarpummi aalisakkanik uumasunillu assigiinngitsunik
toqqaannaq avammut niueruteqarusunnermi saniatigut imermik minguitsumik
nunarsuarmi pitsaanerpaamik mamarnerpaamillu peqarpoq, takornariaqarfissatut
annertuumik ineriartortitsivoq aammali aatsitassanik annertoorujussuarnik
pisuussuteqarluni – ullumikkornit atorluarnerusariaqakkaminik. Nunarpummi
aatsitassanik nunarsuarmi pisariaqartinneqaqisunik, soqutiginaatilinnik
annertoorujussuarnik pisuussuteqarpoq atorluarneqartariaqalersunik.
Namminermi aamma uanga aatsitassanut Naalakkersuisuunerma nalaani Donald
Trumpit presidentiunerata siulliup nalaani atorfilittat arlallit naapittarsimanerat
tunngavigalugu, sutigut tigussaasunik ineriartuutaasinnaasunik Trump
toqqaannartumik oqaloqatigerupparput – soorlu aamma EU taamatut
oqaloqatigineqartalereersoq.
Tamakkulu ilaatigut tunngavigalugit nunatta USA-llu akornanni
toqqaannarnerusumik suleqatigiinnerup annertusarnissaanut USA-p
presidenteriligassaata qanoq takorluugaqarnera Siumumiit ataatsimeeqatigiinnermi
tusassallugu qilanaarutigaarput.