Nunarput sinnerlugu Naalakkersuisut sulisussaammata akisussaassuseqartuullutillu, sulinermi tassani partii Siumut tamakkiisumik tunuliaqutaavoq. Naatsorsuutigaaralu Siumut sinnerlugu suliaqartut tamarmik tamanna ataqqeqqissaarlugu sulissasut
All.: Erik Jensen, siulittaasoq, Siumut
Ulluni kingullerni Siumut tusagassiorfitigut sammineqarnera Siumup Siulersuisuunerisa arajutsisimanngilaat, taamaakkaluartoq Siumup malittarisassai naapertorlugit Siumup Nuup isummeqqusissutaanut Siulersuisuunerit isummerfissaqanngillat.
Tamanna tunngaveqarpoq, Siumut partiitut qanoq ilaasortamik nalilersuiffigineqarnissaannut tunngasut malittarisassat marlussunnik periarfissiissuteqarmata. Periarfissat siulleraat ilaasortaajunnaarsitsinissamik aalajangerneq immikkoortortaqarfinniit tunngavilersukkamik allakkatigut aallartinneqarluni aalajangerneqarsimassasoq, periarfissallu aappaat tassaavoq Inatsisartut gruppeanni akunnerminni peersitsinissaminnik aalajangiussaqarsimasussaammata.
Taakku arlaannaalluunniit pisimanngillat, taamaammallu Siulersuisuunerit imaluunniit Inatsisartut gruppe pineqartumut isummerfissaqanngillat, malittarisassat tunngavigalugit sulineq ingerlattussaammat.
Siulittaasutut eqqumaffigaara, Nunatta naalagaaffinngornissaanut aqqut qanoq aqqutissiorneqassanersoq ataasiakkaat oqaasertalersuiffigigaat, tamannalu Siumut anguniagarimmagu aammalu tunngaviatigut qinikkatut sulinerup ilagiinnaraa isumaqarpunga. Erseqqissassavarali naatsorsuutigilluinnaqqissaarakku, apeqqummi tassanittaaq Siumup ataatsimeersuarneranit aalajangersakkat tunngavigalugit ingerlatsisoqartoq, pisariaqassappallu immikkuullarissumik pisoqarnerani taakkua tunngavigalugit sulineq naleqqussaanissallu ingerlanneqassammata. Siumullu isummernissaa inuppassuarnit utaqqineqartoq nalunnginnakku, Siumup aqqutissatut aalajangersarsimasai piffissami qaninnermi avammut nalunaarutigineqassapput. Nalorninaatsumik Siumumi nunarput inuilu sumut ingerlassanersut aammalu aqqutit suut atorneqarnissaat ilanngullugit.
Inatsisartunut ilaasortat qinikkatut sulinngiffeqarallarnerisa qaqugukkut atuukkunnaarsinneqarnissaanut tunngatillugu, apeqqummi tassani aalajangersaanissaq partiimiinngilaq. Qinersisartut qinigaat namminneq pisinnaatitaaffeqarput aalajangissallugu, Inatsisartuni sulinermut qaqugukkut tamakkiissumik uteqqikkumanerlutik. Uangalu partiimi siulittaasutut inatsisartuni qinikkat tamaasa piginnaasaat assigiinngisitaartut atorluarlutigit ataatsimoortissallugullu sulinera ingerlappara.
Naggataatigut erseqqissarusuppara, ulluni makkunani Nunatta imaanaanngitsumik inissisimanerani Nunarput sinnerlugu Naalakkersuisut sulisussaammata akisussaassuseqartuullutillu. Sulinermi tassani partii Siumut tamakkiisumik tunuliaqutaavoq, naatsorsuutigaaralu Siumut sinnerlugu suliaqartut tamarmik tamanna ataqqeqqissaarlugu sulissasut.