Siumut ileqquusumik ataatsimeersuarpoq Qasigiannguani ulluni 28. – 30. juli 2023. Tassunga atatillugu Siulersuisuuninngortut ataatsimeersuarnerup ingerlasimanera pillugu nalilersueqqillutik misissuisimapput.
All.: Hans Peter Poulsen, aaqqissuusaanermut siulittaasup tullia
Kukkunersiuisut aammalu siulersuisut misissuinerat naammassineqarsimalersup uppernarsarlugu takutippaa, Siumut Nuup immikkoortortaqarfiani siulersuisuni siuttup siulia, Siumup Nuna tamakkerlugu ataatsimeersuarnissamut aallartitassat qassiunissaanut tunngatillugu, ilaasortaqassuseq pillugu peqquserlussimasoq. Siumup Nuna tamakkerlugu malittarisassai naapertorlugit immikkoortortaqarfiit 100-t sinnerlugit ilaasortallit pingasunik taasisinnaasunik aallartitaqarsinnaapput. Ilaasortaqassuserlu eqqunngitsumik nalunaarsorsimasaq atorlugu Siumut Nuuk pingasunik taasisinnaasunik aallartitaqarsimavoq.
Siumut Nuummi siulittaasuusimasoq aamma akisussaasimasut ilaat Siumumut ilaasortaajunnaareermata taakku annerusumik malersoqqinneqarnissaat Siulersuisuunerit pisariaqartutut isiginngilaat. Taamaattoq avammut nalunaarutigisariaqarlugu, ilaasortaanermut akiliisarsimasut allattorsimaffiat eqqunngitsoq atorlugu ataatsimeersuarnermut peqataatitaqartoqarsimammat, taamaalli qulaajaanerup kingunerisaanik eqqunngitsuliorsimanerusoq uppernarsarneqarmat.
Pisimasoq ilungersunarmat aamma partii Siumup malittarisassaanik naleqartitaanillu ima innarleeriartigimmat unioqqutitsinerujussuummallu akuersaarneqarsinnaanngitsoq, Siumup Siulersuisuunerisa oqaatigissavaat.
Siulersuisunut ilaasortaasimasut sinneri pisumut qanoq ilisimasaqarsimanersut pillugit nassuiaaqquneqassasut allattoqarfimmut suliakkiutigineqarpoq, aamma pisisimasup uteqqinneqannginnissaa siunertaralugu suliniutinik aallartitsisoqarnissaa ilanngullugu.