Inuit ersinngitsumik innarluuteqartut immikkullu pisariaqartitsisut pillugit ilisimasat naammanngillat sulisussallu amigaataallutik. Maanna inuit innarluutillit ersarissumik pisinnaatitaaffeqalernissaat pillugit inatsisiliortoqarnialerpoq, taannalu ulluni makkunani tusarniaassutigineqarpoq. Inatsit eqqortumik atorneqarani uninngaannalissanngippat, eqqumaffigisassat amerlapput.
All.: Paarnannguaq Mathiassen, siulittaasoq, Siumut Ilulissat
Ersinngitsumik innarluuteqartut immikkullu pisariaqartitsisut eqqartorneqartillugit oqartussaaqataaneq, pineqartullu tusaaneqarniarneq ajornerat ajornartorsiummik annertuumik pilersitsisarpoq. Inuiaqatigiittullu ileqquvut allanngortinngikkutsigit, inatsisilioraluaruttaluunniit annerusumik alloriarnavianngilagut.
Minnerpaamik inatsisissami erseqqilluinnartumik naqissuserneqartariaqarpoq, suut kommunit suliassarineraat naammassisassarineraallu, taamaaliornikkut akisussaaqataanissamik pisussaaffik qimarratigisinnaajunnaarsillugu. Inuit ersinngitsumik innarluutillit ikiorniarneqartarnerat qanoq ilungersunartigisartoq misilittagaqartugut nalunngilluarparput, ullumikkullu ikiuisussaagaluartut iliuuseqarsinnaasannginnerat takornartarinngeqaarput.
Akisussaaffimmik tigusisoqarumanngilaq
Ersinngitsumik innarluuteqartumik immikkullu pisariaqartitsisumut angajoqqaajulluni aaqqissuussaanitsinni sullinneqarnermilu pissutsit ilungersunartorujussuupput. Oqartussaasut arlaannaataluunniit suleqatiginngilaatigut. Allaffeqarfimmut uteqattaartinneqartarpugut akisussaaffimmillu tigusiumasoqassanani aporfissalersorneqarujussuartarpugut. Ilinniarfiit, kommunit, Namminersorlutillu Oqartussat imminnut pisuuteqattaartarput, arlaannaalluunniillu akisussaaffimmik tigusiumaneq ajorput.
Soorlu aamma politikikkut qinikkat taamak pissusilersortuartut, akisussaaffimmik tigusiumanatik imminnut pisuuteqattaartarput assortuullutillu.
Politikikkut qinikkat suliassanut, soorlu ersinngitsumik innarluuteqartut pillugit aamma immikkut pisariaqartitsisut pillugit, soqutiginninnerat annikitsutut oqaatigisariaqarpoq. Nunatsinni sanngiinnerpaartatta pitsaasumik aqqutissiuunnissaat pimoorullugu aalluttariaqaraluarpaat, inuiaqatigiinnimi sanngiinnerpaartatta atugaat qanoq pitsaanerpaamik aaqqinniarnissaat suliassarivaat.
Atukkat pitsaanerulissasut neriunarpoq
Inuit innarluutillit tapersersorneqarnissaannut Inatsisartut inatsisissaattut siunnersuut sorpassuartigut pitsaasuusoq nalilerneqarsinnaavoq. Kisianni ersinngitsumik innarluuteqartumut immikkullu pisariaqartitsisumut inatsisissaq aporfilersueqqissanngitsoq pinngitsoorata qulakkeertariaqarparput.
Assersuutigalugu ilinniarnissamut periarfissiissuteqarnissaq allatigulluunniit akiorneqartariaqarneq pillugit, suna pineqarnersoq paasisimasaqarfiginagu aporfilersuisoqaqqissanngilaq – neriuppunga.